اخواتي الكريمات
البحوث مو تجارب شخصيه
اللي يسوق طرق خارجيه يكون اكثر عرضه لحادث سير
بس هل كل واحد ركب الطريق الخارجي اندعم ؟
الجواب لا
مثال اخر
الرضاعه الصناعيه عامل خطوره لتسوس الاسنان بعد عمر السنه
بس هل كل الاطفال اللي بقوا للسنه و نص متسوسه اسنانهم ؟
الجواب لا
البحث يستند على عده امور يتم استثناؤها او توكيدها حسب الباحث
وحده من البحوث تكول الفتق المغبني اقل لدى الاطفال اللي يرضعون طبيعي
زين الفتق هو عيب خلقي بعدين يبين !!!!
ليش اقل باللي يرضعون طبيعي ؟
محد يعرف
مثال رابع
الامهات اللي يرضعون طبيعي تحميهم الرضاعه الطبيعيه من سرطان الثدي بنسبه ٥٠ %
بس هل كل اللي يرضعون طبيعي ما عدهم سرطان ثدي ؟
الجواب لا
بس لو نجيب ١٠٠ امراءه ترضع طبيعي و ١٠٠ امراءه ترضع صناعي
راح نشوف انه اذا صار سرطان الثدى ب ٥ امهات من اللي يرضعن طبيعي راح نلكه انه اللي صار عدهن سرطان الثدي ١٠ امهات
يعني حمايه بنسبه ٥٠ %
مثال اخر
التدخين كلنا نعرف يسوي سرطان الرئه بس هل كل المدخنين صار بيهم سرطان الرئه ؟
الجواب اكيد لا
لذلك خلونا نفهم كيف يكون البحث قبل ما نطلق اراؤنا الشخصيه
من اقرا ارائكم الشخصيه على اي موضوع ما انزعج ابدا هذه ارائكم و حياتكم بس لا تروجون للخطا
انت حياتك خطا
انت مرتاحه للرضاعه الصناعيه و طفلك عمره سنه و نص و بعدك تنطين حليب بقري بالمميه و معرضه طفلك للخطر لا تروجين الها حدك نفسك و عائلتك و بس
و طبعا هنا اقصد المميه مو الحليب
و الا ما يفرق ابدا عن مبدا ( مو انطينا و ما صار شي )
المبدا الخطا اللي ما معناه انطينا و ما صار شي و ننتظر لما يصير
اسف للكلمه بس هذا تصرف مو ذكي انه اني اخاطر بحياتي حتى انتظر يصير شي !!!
د. سيف سمير البياتي
اخصائي طب الأطفال
