ناخذ فيتامينات و حبوب فيتامينات لو اكل متنوع ؟
السؤال الواضح و اللي جوابه يفرق بين شخص و اخر
خلونا اول نتفق
المناعه ما تجي بليله و يوم
المناعه تعتمد على اكلك و صحتك و جيناتك و نومك
اكلك زين و متنوع
خلص ماكو داعي تاخذ فيتامينات
نجي للفئه اللي اكلهم ما متنوع
الفيتامينات المهمه بالمناعه هي 3
اولها فيتامين دي
و هذا بالاطفال خاصميه انه ننطي لاول سنه 400 وحده فيتامين دي للاطفال اللي يرضعون طبيعي
و نترك قرار فيتامين دي للطبيب للاطفال اللي يرضعون صناعي و هو راح ياخذه من الحليب مالته على الاكثر بس هم نترك القرار للطبيب
فوك السنه اذا استهلاكه للالبان او الجبن او الحليب قليل ننطي 600 وحده دوليه
الحوامل و المرضعات ياخذن 800 وحده دوليه
كبار السن و اللي ماعدهم مشاكل بالكليه ياخذون 800 وحده دوليه بعد التشاور ويه طبيبهم
.
ثاني الفيتامينات هو فيتامين سي
يفرق هذا حسب الاعمار
جوه عمر السنه يحتاج 50 ملغرام
و من عمر سنه الى 3 سنوات يحتاج 15 ملغرام
و فوك 3 الى 7 سنوات 25 ملغرام
بعدها يتراوح الاحتياج بين 50 الى 80 ملغرام باليوم فوك اعمار 7 سنوات
و الحامل و المرضع تحتاج 115 ملغرام
اوكي ما ندوخ بالارقام
برتقاله وحده بيها 80 ملغرام
و فلفل اخضر وحده بيها 90 ملغرام
يعني برتقاله يوميا كلش كافيه
زين انت جيت و اصريت الا تاخذ فيتامين سي
اكولك اوكي اخذ بس لا تتجاوز ال 500 ملغرام كبالغ
بالنسبه للاطفال لا ياخذون فيتامين سي اكثر من الجرع المكتوبه فوك
و نذكر ان فيتامين سي الصناعي ممنوع على المرضى اللي عندهم نقص بانزيم داء الباقلاء كبارا و صغارا
اخر معدن مهم بالمناعه هو الزنك
و الجرعه اللي نحتاجها يوميا للاطفال
جوه السنه 2 ملغرام
من سنه الى 3 سنوات 3bملغرام
4الى 8 سنوات 5 ملغرام
9 الى 13 سنه 8 ملغرام
فوك ال 14 سنه 11 ملغرام
ما ندوخ روحنا بالارقام
100 غرام لحم بيها 5 ملغرام زنك يعني نص اللي تحتاجه من الزنك
الحمص و البقوليات كل 100 غرام بيها 2 ملغرام زنك تقريبا
الجبن قطعه صغيره منه بيه زنك 3 ملغرام تقريبا
لذلك تاكل من ذني الاكلات تحصل احتياجك اليومي من الزنك
و هم ارجع و اكول الاكل احسن
ارجع و اكرر
الاكل احسن من الملتي فايتمين
و النوم احسن منهن كلهن
لأن يعيد النظام المناعي كله
ثانيا الاطفال اللي معتمدين على المميه تحت عمر السنه ماكو اي داعي للمقويات روتينيا لان الحليب ينضافله بكافه انواعه الطبي و الغير طبي تحت عمر سنه الكثير من الفيتامينات بس اكيد ما يعوض عن الاكل
ثالثا امهات و اباء الحليب بعد عمر سنه اسف خطا نظريتكم الاكل احسن بعد عمر السنه و ما يعوض و لا يعزز المناعه الحليب بكد الاكل
د. سيف سمير البياتي
اخصائي طب الاطفال
