خلال 15 سنه من طب الاطفال
مرت عليه الاف الحالات
اللي بقوا بالمستشفى ساعه و اللي مجرد استشاروا و طلعوا و اللي بقوا بالمستشفى شهر و اللي كورس علاجه ٣ سنين و اللي علاجه شراب بسيط و اللي علاجه مجرد ارشادات و اللي علاجه علاج كيميائي و اشعاعي
بنفس الوقت اشوف امهات متضايقات من وكاحه اطفالهم او لان ابنها ما يمشي و عمره شهرين او ما يحجي و يكول بابا و ماما و عمره ٦ اشهر !
من اسمع هيجي شكاوي راسا اتذكر الاطفال اللي بقوا بالمستشفيات لاشهر
راسا اتذكر الامهات اللي اولادهم عدهم اعاقه تخليه ما يمشي و ما يتحرك و بنفس الوقت هذه الام تكون صابره و مثابره و شايله ابنها على راسها
ابدا لا تضوجين من طفلك لان وكيح او حرك او ما يحجي بعمر ٦ اشهر او ما مطلع سن و عمره شهرين او ابنك مو سمين مثل ما ابن خالته سمين و لا تضوجين لان تريدين ابنك سمين و هو ضعيف
امي اختي
اذا ابنك بحضنك و يضحكلك و يناغيلك
او ابنك مخليك تركضين وراه و متعبك
احمدي ربك على نعمه
فالصحه ما يحس بقيمتها الا فاقدها
د. سيف سمير البياتي اخصائي طب الاطفال
