خطيه ضعفان و مصوفر و وجهه ذبلان !
شنو ما تنطوه اكل !
انت تشوفيه زين و دا ياكل و يلعب و يتحرك و اكله زين
بس لازم احد يتدخل و يكولك هذه الجمله
من تسمعيها و تصدكيها
قيسي وزن طفلك ويه طبيبك
افهمي منه هو طبيعي لو لا
اول سؤال اسئله للام بالاطفال اللي عمرهم اقل من سنه
و الاطفال اللي جاييني علمود قصر القامه
هو وزن الولاده شكد؟
اكو ام تولد وزن طفلها 2 كيلو و بعمر الشهر يصير وزنه ٢٦٠٠ و نفرح بيه
و اكو تولده ٤ كيلوات و بعمر الشهر وزنه ٤٢٠٠ و نظل نفكر ليش هذا فشل النمو
رغم بعمر شهر هذا ٢٦٠٠
و هذا ٤٢٠٠ !!!!
اعرف انصدمتي
هذا الفرق ممكن يستمر للسنه او السنتين هذا الفرق
.
.
عامل اخر طول الام و الاب شكد
هي مو مقارنه ويه ابن خاله الطفل لان اسمن و بس
هوايه عوامل تدخل بالموضوع
و اوكي فعلا الوزن قليل و ما يزداد
شنو اسوي؟
راجعي طبيب و مو مراجعه وحده
تابعي النمو وياه و راقبيه على خطوط النمو
ممكن يدزه تحاليل و المهم هذه يم طبيبك ما نتدخل بيها
بعدين ابدي :
1. اكل صحي بعيد عن السكريات و المشروبات الغازيه
2. نوعي التغذيه اطلقي الابداع اللي بداخلك و اصنعي اكلات جديده
3. الاكل اللي انت تطبخيه اله تذوقيه ؟
يعني طيب
سويه طيب اله
4. قللي الحليب بعد عمر السنه
ما ننكر فضل الرضاعه الطبيعيه بعد عمر السنه
بس بعد عمر السنه لازم ياكل
ما اكل نقلل الرضاعه طبيعي او صناعي
الحليب الصناعي اسهل و قانونه هو مرتين فقط يوميا
5. مقويات و فيتامينات و اخذناها من الطبيب بس مو ننطي مقويات و نشرب الطفل سكريات او عصير
نقلل الاكل الغير صحي
6. زيدي الطاقه اللي بالاكل
الرز مثلا
الشوفان
زبده الفستق رائعه
الجبن مثال اخر
و انزل بوست عن الاغذية الغنيه بالطاقه قريبا
بصورة عامه طعام الاطفال محتاج جهد
مو محتاج مقويات و مشهيات و تسمين كأنما فد شي يسمنوه حتى يذبحوه ع العيد
محتاج الطفل يكون مستلذ بالاكل
محتاج وعي بمدى سوء النستله و الجبس و الكيك الجاهز و الحلويات و العصير و المشروبات الغازيه و كثره الحليب اكثر من مرتين بعد عمر السنه
ديروا بالكم عليهم
د. سيف سمير البياتي اخصائي طب الاطفال
from د. سيف سمير البياتي