بمناسبة اليوم العالمي للفتيات الصغار (اعرف خبصتكم بية اليوم)
احب اركز على اهمية التعليم للبنات، للاسف الى يومنا هذا نسمع ونشوف عوائل تكول على شنو تعليم البنات، هن للزواج والخلفة ميحتاجون تعليم💔
راح استذكرلكم قصة الطفلة سارة، سارة كانت طفلة ذكية جدا ومميزة التقيت بيها باحدى الايام في احد مخيمات النازحين، باحدى الفعاليات الي تضم العديد من الاطفال، ولماسالت سارة شنو امنيتج؟
كالت اتمنى اصير معلمة واساعد الاطفال واعلمهم، اني جاوبتها لازم تقرين زين وتصيرين شطورة بلمدرسة حتى تكدرين تصيرين معلمة❤️، هنا الطفلة تغيرت ملامح وجهها وكالت اني مااكدر اروح للمدرسة واخذت اختها الصغيرة وغادرت المكان ،وماكدرت اعرف منها تفاصيل الموضوع، فقررت ازورهم واحجي وية عائلتها
بعد ماحجتلنا امها انه والد سارة اتوفى اثناء النزوح وانة اهل والدها رافضين انه يطلعون اوراق رسمية للبنات ، كون ان الاب والام متزوجين بعقد شيخ وماعدهم امر محكمة فمايكدرون يسجلون الاطفال اله اذا اهل المتوفي يوافقون، بس جدهم يكول ميحتاجون الاوراق هن بنات مااكدر اسجلهم💔 حاولنا انه نتوسط يم الجد ونحجيلة اهمية الاوراق بتسجيل البنات بلمدرسة، رد انة البنات مايريدلهم تعليم وخل يجون يخدمون جدهم وبيبيتهم احسن من المدرسة والكلام الفاضي😣
طبعا امهم كانت مرة فقيرة جدا وعدها ثقه بعمها الي هو ابو زوجها واخ ابوها بنفس الوقت، وكانت معتقدة انة راح يساعدها بتحضير هويات البنات، وكالت الموضوع مسالة وقت وراح احاول انه اقنعة او ااثر على اخوة زوجي حتى يوافقون على توثيق عقد الزواج واظهار الهويات.
وعلى هالاساس اتوسطت احدى منظمات حماية الطفل ونسقوا مع المدرسة انه سارة تحضر الدروس بلمدرسة الى ان تكمل اوراقها ويصير تسجيلها رسمي، مدير المدرسة متفضل وافق انه ينتظر الى وقت امتحانات نصف السنة حتى سارة تكدر تشترك بالامتحانات
وبهالاثناء كانوا عمام البنات راح يحضرون للشهادة على العقد، بس تراجعوا باخر لحظة بسبب تهديد الجد(ابوهم) الهم، ولان سارة ماكدرت تحصل الهوية انطلب منها انه تترك المدرسة.😞
سارة هي وحدة من مئات الالاف الضحايا، ضحايا الجهل وعدم المساوة وقلة الوعي بابسط حقوق البنات والنساء 💔
تحياتي
د.همسة الدهان
#همسة_الدهان
#اليوم_العالمي_للفتيات
