شائعات تلاحق الرضاعة الطبيعية:
1️⃣الشائعة :
لاترضعين بعدين تصيرين سمينه دبه
⭐الحقيقة: زيادة الوزن ليس لها علاقة بالرضاعة، زيادة الوزن لها علاقة بكثرة الاكل (وخصوصا الغير صحي) وانعدام الحركة
❤️الحل:اكو هواي يصير عدهم جوع قوي ومتكرر، فالحل هو توفير طعام صحي على شكل سناكات
مثلا اصابع جزر، مكسرات، فواكه، بسكت شوفان ،
والابتعداد عن البقلاوة والزلابية خصوصا نص الليل
مع حركة بسيطه لان اكو يصير عدهم ثبات بالوزن رغم انها ملتزمة بالاكل الصحي،
وهنا ننصحهم بالحركه، مثلا مشي، هرولة بسيطه حتكون كفيلة لتحفيز الايض
2️⃣الشائعة:
لاترضعين تره تكرعين وشعرج كله يوكع 😅
⭐الحقيقة: اثناء الحمل ترتفع هرمونات معينه تخلي الشعر يصير كثيف ولامع ، وميتساقط بالمعدل العادي وانما يبقى لشهور،فيبدو الشعر انه صار اثخن
وبعد الولادة حوالي 3-4 شهور ينزل الهرمون وبالتالي الشعر كله الي جان مواكع خلال اشهر الحمل والي جان مفروض يوكع شهريا او اسبوعيا، يوكع كله سوه
فيصير عندج منظر مخيف من سقوط الشعر وينترس البيت شعرررر 😅
❤️الحل: لتنصدمين بهذا التساقط وتذكري ماله اي علاقة بالرضاعة وكل النساء تعاني منه بعد الولادة حتى الي تختار الرضاعة الصناعية
بنفس الوقت اهتمي بغذائج وخصوصا الخضروات الورقية
3️⃣الشائعة: الي ترضع طبيعي تصير ريحتها مو طيبه!
⭐الحقيقة: ماكو اي رباط ، الريحه المو طيبه هي دليل عدم نظافة شخصية وفقط ، مالها علاقه بنوع الرضاعة
❤️الحل: بعض النساء ونتيجه تغير هرمونات الجسم تصير عدها حاسه الشم حساسه وتشم الروائح اقوى، وبعض الاحيان تتغير رائحه الجسم ، وعليه سواء حامل او غير حامل، مرضع او غير مرضع، تبقى النظافة الشخصية مطلوبه وتغير الملابس باستمرار
4️⃣الشائعة: لا ترضعين طبيعي بعدين الطفل يلطش بيج
⭐الحقيقية : هاي تتبع شخصية الطفل ، اكو اطفال high need واكو لا
ماله علاقة نوع الرضاعة ، يبقى الطفل صاحب المتطلبات العالية يطالب بالتصاق اعلى بالام ،
وهواي امهات ترضع صناعي واطفالهم ملتصقين بيهم
❤️الحل: مثل ماكتلكم اول سنه هي سنه مصيرية ، من اول اشهر ولمجرد تحسين نفسج عندج قدره للخروج خارج المنزل لاتترددين ابدا اخذي الطفل واطلعوا لكل مكان وبكل وقت هذا يخلي الطفل يتعرف على بيئات مختلفة ويصير اجتماعي وتقل حده التعلق بشكل كبير ؛ وطبعا مع الاستمرار بالرضاعة حتنطي حاجاته العاطفية بشكل مستمر
وحتلاحظين الطفل يكدر ينفصل بشكل اسرع بكثير من الطفل الي يكضي اول سنه كلها بغرفه وحده ومشايف وجوه غير وجه امه وابوه
بعد شنو سامعين شائعات؟
د.اسماء اسماعيل البدري
from د. سيف سمير البياتي