شكد ياكل الطفل!!
السؤال الابرز حول كل الاطفال هو شكد ياكل الطفل و شوكت و كم و شنو النوعيه و غيرها
اتصور اني ما مقصر بالاجابه عنها كلها
هذا البوست عن شكد ياكل الطفل بالاعمار اقل من سنه
شهر بشهر
البوست طويل جدا
خلينا نتفق انه شهيه الطفل للاكل مو ثابته
و تتغير يوميا
و حتى تتغير باليوم الواحد
ممكن التسنين جدا يؤثر على شهيته
و المرض
انسداد الانف ممكن يؤثر
لا ننسى انه ممكن يكون منزعج لاي سبب و ما عاجبه ياكل
شون اعرف انه شبع الطفل؟
ببساطه اتبعي احساس طفلك من يرفض الملعقه التاليه خلص لا تجبريه عليها
اتبعي إحساسه
و تذكري دائما انه ادخال الوجبه او الاكله الثانيه صعب و ما ممكن يتم من اول مره و لا ثاني مره و لا ثالث مره و لا حتى عشرين مره
و على مدى شهر فانتظري و اصبري و ظلي حاولي
ما حب خلص لا تستلمين دخلي الوجبه بطبق اخر
مثل البيض بالمعجنات
و الفواكه باللبن
و غيرها من افكار الطبخ المختلفه
نبدا بسم الله شهر بشهر
.
.
قسم يقررون انه يبدون يوكلون بعمر ٦ اشهر و قسم بعمر ٤ اشهر
يعني ١٨٠ يوم او ١٢٠ يوم
ما علينا بكل الحالات اذا اقل من ٦ اشهر نبدي وجبه وحده فقط باليوم
فقط
و ما نروح لوجبه رقم ٢ الا بعمر ٦ اشهر
ماكو مشكله اذا انطينا وجبه يوم و ثاني يوم وجبتين
بس بصوره عامه افضل وجبه واحده الى حد عمر ال ٦ اشهر
شون نبدي؟
نبدي ملعقه كوب صغيره من الرز مثلا ( اكيد اقصد مي الرز او الرز المهروس بالمحضره )
و ثاني يوم ملعقتين
و ثالث يوم ٣
و نطبق قاعده ال ٣ ايام
اي كل ٣ ايام وجبه جديده
حتى نعرف الطفل تحسس او لا
🌷و صلنا لعمر ٦ اشهر
نبدي نثبت وجبتين
و كل وجبه تكون ٢ الى ٣ ملعقه اكل اما حبوب او فواكه مهروسه او خضراوات مهروسه
الشهر السادس لا تزيدين الكميه خليها نفسها
الا اذا الطفل جدا مستمع فزيديها شويه
نذكر بالقاعده
لا تجبرين الطفل على الاكل
و لا تنسين ادخال اللحم بالوجبات
هنا ممكن ندخل اللبن
🌷 وصلنا لل ٧ اشهر
و نذكر كنا ننطي وجبتين بال ٦ اشهر
اوكي نبدي منا و جاي ٣ وجبات باليوم
و تذكري احنا من اول يوم نريد طفل متربي على روتين
فنريد ٣ وجبات هي فطور و غداء و عشاء
الاكل بعد سهل تقديره بكد قبضه ايده مسدوده
احسبي و شوفي شكد هو هذا حجم معدته و راح ياكل بكده
الحليب يبدي يتراجع و نزيد الاكل
مو تنسين هنا ممكن الجبن يدخل
و اللحم يزيد طبعا
و البقوليات اكثر
خطوه اخرى مهمه هنا ؟
الاكل شويه يثخن و ممكن تاجليه لل ٩ اشهر
بس ثخني بساع حتى نسهل المهمه
اذا ترضغين طبيعي استمري طبعا ويه الاكل
💖 وصلنا لعمر ٨ اشهر الى ٩ اشهر
بعمر ٨ اشهر يبدي الطفل يلزم بيده
هنا نستغل هذه الوضعيه و ننطيه بيده و نكعد كدامه و نراقبه
تتذكرون وصلنا ٣ وجبات؟
اي ال ٣ وجبات باقيه
و ذني الوجبات الاضافيه تصير انه يوكل نفسه بنفسه
و بما انه بدينا هو يوكل نفسه بنفسه
اذا الاكل يبدي يكون اثخن قواما
كميه الاكل ؟
تتذكرون بالبوست السابق كلنا انه الكميه هي بكد قبضه اليد
هنا نبدي نزيد عن الشهر السابق ملعقه اكل او ٢
و الحليب كلش كلش كلش تراجع
و يبقى الحليب عند الحاجه خصوصا لاطفال الرضاعه الطبيعيه
لذلك بالمختصر بهذا العمر نكول
٣ وجبات رئيسيه انت توكليها للطفل او هو ياكلها
و وجبه او ٢ بين الوجبات على شكل طعام الاصابع هو ياكلها
و الحليب بالاخص الرضاعه الطبيعيه عند الحاجه
💖 وصلنا لعمر ١٠ الى ١١ شهر
هنا بعد كافي شوربات خفيفه او ثخينه
ندخل اكل البيت
و ننتبه لا سكر
و لا ملح
و لا عسل
و لا عصير
و لا حليب بقري كامل الدسم ( حليب رقم ٣ او حليب اكياس او حليب باكيتات )
ممكن ذرات ملح
بس الباقيات ممنوعه
و بالاخص لا اكلات ممكن تسبب الاختناق كالمكسرات
تكدرين تضيفين بهارات خفيفه علمود الاطعم المختلفه
راح تلاحظين بهذا العمر انه كميه الاكل بدت تقل
اي عادي لان النمو يبدي يقل
كان يزيد بمعدل ٣٠ غرام باليوم
هسه دا يزيد بمعدل ٥ غرام باليوم !
الوجبات تكون ٣ وجبات
و بين وجبات عدد ٢
نذكر بالملخص :
1. انطي كميه اكل بكد ما يريد
2. ماكو شي اسمه تجبرين الطفل على الاكل
3. كملي رضاعه طبيعيه عند الحاجه
4. افهمي طفلك من يشبع
دائما اؤكد ان اكل الطفل مو علم صواريخ و لا يرادله
يرادلك نفس هاديء و تقليل توتر
و هي الامور تمشي
د. سيف سمير البياتي
اخصائي طب الاطفال
from د. سيف سمير البياتي