قبل فتره قصيره جدا كتبت بوست عن ابو صفار الناتج عن اختلاف فصائل الدم بين الام و طفلها
و حجيت بيه عن موضوع
انه الام من تصير دمها O و طفلها A او B يكون الطفل معرض لابو صفار اكثر
الأمهات متصورات انه بس هذا السبب هو سبب ابو صفار
في حين الاغلب هو ابو صفار الفيزولوجي
اللي هو انه الكبد بعده ما ناضج
و ننتظره ينضج ان شاء الله و يروح ابو صفار
اسباب اخرى ؟
طبعا
اسباب اخرى اكو
مثلا الام دمها سالب و الطفل موجب
خمول الغده الدرقيه
التهاب المسالك البوليه
داء الباقلاء وحده من الاسباب
اسئلي طبيبك عن ابو صفار الناتج عن الرضاعه الطبيعيه و هذا موجود و ما يحتاج شي اذا الارقام غير مخيفه و عمر الطفل عبر اول كم يوم بعد الولاده
قريتوا الاسباب؟
اي التهاب المسالك البوليه ممكن يكون سبب
بس ارجع و اؤكد انه الشائع هو الفيزولوجي اللي يصير عند ٦٠ % من الاطفال المكتملي النمو و ٨٠% من الاطفال الغير مكتملي النمو
ماكو سبب تكدر تحزره وحدك
بس اكو عوامل خطوره واحد يخليها بباله
هل هذا البوست راح يساعدك بمعرفه سبب ابو صفار بطفلك؟
لا بس راح يساعدك تخلين بالك اكثر
يعني شون؟
🌷اذا دمك سالب تخلين بالك اكثر اذا دم طفلك موجب
🌷اذا دمك O ما تطلعين من المستشفى الا و انت تعرفين فصيله دم طفلك A او B او AB
🌷اذا زوجك عنده داء الباقلاء راقبي ابو صفار بنتك جيدا
🌷و اذا خوال طفلك او طفلتك عدهم داء الباقلاء راقبي ابو صفار ابنك جيدا
هذه بصوره عامه
و نؤكد و نعيد
ابو صفار لما يكبر الطفل خلي نكول ٧ ايام بعد تقل خطورته فمراقبته مهمه جدا اول ايام بعد الولاده
لا تتماهلين ابدا بابو صفار
ابو صفار الخفيف ماله علاج غير كثر الرضاعه
و الشديد لا و الله مستشفى يحتاج
و سوالف الثوم و البصل و مي و سكر عنب و روبه و تشريح الاذن و الشمعه النيون لا تقدم و لا تاخر و بالعكس شفنا بيها تاخير و تهديد لحياه اطفالنا
اخر ملاحظه: فصيله دم زوجك مالنا علاقه بيها
و هم راح تكتب ” اعشق انفاس زوجي ” اني B و زوجي A شاسوي
يمه و الله ما علينا بيه
الموضوع بينك و بين طفلك
د. سيف سمير البياتي
اخصائي طب الاطفال
