كيف تعلم طفلك الانگليزية بطلاقة!
كثير وصلتني مسجات بعد فديو اول يوم مدرسة انه شلون بنتج تتكلم الانگليزية بطلاقة وباي روضة ووين وكذا
رح الخصلكم الموضوع👌🏽
💗جود اتعلمت اللغة بطلاقة بالبيت بدون مدرسة او روضة اي نعم بالبيت مثل هواية من اخواننا الاكراد والتركمان والمسيح يعلمون لغتهم بالبيت واللغة العربية تكتسب بالمدرسة والاصدقاءوالتعامل خارج البيت .
💗حتى تعلم طفلك لغة ثانية لازم تكون انت تتحدثها وتتواصل ويا الطفل بيها حتى لو كلمات بسيطة مو معقدة لان هو بس يبدي رح يتعلم 👌🏽
💗بديت من عمرها اشهر اعلمها شلون تحجي بس كله بالانگليزي هذا pen هذا water ومن تريد الشغلة او اريد شغلة اطلبها بالانگليزي
💗طولة بال وصبر ويا اطفالي كلهم اني ووالدهم كنا نخليهم ساعة او ساعتين منتواصل او نجاوب الا يطلبون بالانگليزي🥲 يتعاجزون يحجون وهمه يفتهمون وبعدين يضطرون يحجون بالانگليزي
💗 البرامج الي تشوفها من كارتون او اغاني تعليمية كلها كلها انگلش مثل
Peppa pig
Ben and Holly
كلها حلوة وتعلم هواية اشياء بس بالانكليزي😅
💗جود تفتهم كل العربي وتحجي عربي بس ترتاح بالانكليزي وبدت هسه تحفظ قران بالمدرسة عادي جدااا
💗عمره التعلم لاي لغة ميكون خطأ ابدااااا هذا زيادة بالتعلم تنفع بكل الاحوال واختها الكبيرة حاليا بالمتميزات وماعدها مشكلة باللغة الانگليزية الي هي اساس منهجهم 👌🏽
الطفل اسفنجة لكل شي انت تعرضه امامه ومجرد ترغبه بالتعلم للغة اضافية يتعلمها بشكل تتفاجئ بي
💗💗💗الله يحفظ اطفالكم والموضوع اختياري وهو زيادة بالتعلم بشي اني احبه من اني صغيرة لان جدا احب اللغة الانكليزية 😍
💗مو لان احنه اطباءابدا مو هذا السبب هذا سهل الموضوع بس اني اتعلمتها من قبل دخولي لكلية الطب ولومو صايرة طبيبة كنت مقررة اروح كلية اللغات😍💗الي يفكر يخلي اطفاله بمدارس او روضات انكليزي تمام وصح بس انت بالمقابل لتتوقعه بيوم وليلة يتعلم
وثاني شي لازم انت هم تبذل جهد ويا المدرسة وحدها مو كافية 👌🏽
ان شاء الله تستفادون من تجربة جود وهو موضوع اختياري وماله علاقة باساسيات التربية او الصحة 😊
.
.
.
د رحاب مجيد
from د. سيف سمير البياتي