مساء الخير
اليوم راح نحجي على موضوع مهم جداً ودائما نأكد عليه هو الرضاعه الطبيعيه واسهل الطرق حتى نتجنب الحليب المصنع (حليب القواطي) ونبدلة بحليب الام حتى اذا كانت الام برة البيت .. بالشغل .. او ب اي مكان بحيث يتعذر عليها ترضع الطفل من صدرها
اكيد عند الرضاعه الطبيعيه حياخذ الطفل الحليب الجاهز الدافي الغني بالفيتامينات والمعادن وغيرها من المكونات المفيدة مباشرهً من صدر امة لكن اكيد اكو اوقات الام مراح تكون جاهزه انو ترضع الطفل … بهاي الحالة ممكن ان تكون ساحبة حليب من صدرها وخازنته حتى تنطي للطفل بهذا الوقت وحنحجي بهذا البوست عن طريقة السحب والخزن و كيفية اعطاء الحليب للطفل،
…………………….سحب الحليب…………………….
عملية سحب الحليب تكون اما عن طريق الملاطة الاعتياديه او عن طريق الملاطة الالكترونيه (pumper) يمكن الالكترونيه سعرها اغلى بس اكيد اسهل و اذا نحسبها صح حتكون بكلفة حصة اسبوعين من حليب القواطي،
يكون السحب كل مرة من صدر يعني اليوم نسحب من الجهة اليسرة باجر نسحب من الجهة اليمنه..
…………………….طريقة الخزن………………………
١- بعلب زجاجية محكمة الغلق
٢- علب بلاستيكية محكمة الغلق بس لازم يكون مكتوب عليها (BPA free) تكون خالية من مادة ال BPA الي تكون مضرة للطفل
ملاحظة: العلب هنا مقصود بيها علب وليس ممات
………………………مكان الخزن………………………
١- يخزن الحليب في الثلاجة لمدة اقصاها ٧ ايام
٢- ممكن خزنه في درجة حرارة الغرفه بس اكيد مو بصيفنا الحار يعني بالشتاء او الربيع من تكون درجة الحرارة ٢٦ او اقل لفتره ٦-١٠ ساعه.
٣- اما بالصيف او كخيار اخر ممكن خزن العبوة داخل حافظة البرودة او توضع مع قطع ثلج داخل فلينة او ترمز لمده ٢٤ ساعه.
……………..استخدام الحليب المخزون…………….
من نريد نستخدم الحليب المخزون ناخذ من عبوة الحفظ كمية بقدر ما يحتاجة الطفل فقط مو اكثر حتى نتجنب خسارة الحليب لان بعد ما ندفي الحليب ما ممكن نرجع نخزنه لان راح يتلف.
و الكميه هي حسب ما يشبع طفلك
نخليها بالممة و نخلي الممة بوعاء مي دافي لحد ما يدفى (او بدفايه حليب خاصة) ونشوف حرارته قبل ما ننطي للطفل (لا يكون صار حار شوية عليه)
بعدها يكون جاهز انو يشربة الطفل.
ملاحظات:
١- دائما نفضل اعطاء الحليب من الصدر مباشره على الحليب المخزون مسبقاً يعني نخلي خزن الحليب بس للاوقات اللازمة فقط
٢- الحليب المخزون صحيح راح يفقد كمية من فوائدة كلما طالت فتره الخزن بس حيبقى مفيد وصحي اكثر من الحليب الصناعي
٣- من الممكن اذا ردنا خلال الرضاعه نضيف حليب الام الجديد لكمية مخزونه سابقا بس اول شي ندفي الحليب المخزون ونضيف الحليب الجديد وننطي للطفل
٤- حليب الام يكون صالح للشرب حتى اذا تم (تجميدة) لفتره ٣-٤ اشهر لكن اكيد هذا الشي مستبعد بس حتى نعرف انو مراح يفقد فوائدة حتى بعد هذه المده
دمتم بسلام 🌸
