من اغرب الاشياء الي يطبقوها على الاطفال حديثي الولاده أنه تعوف ضوء الغرفه مفتوح ليلا مع نهارا 😳
ليش ؟!
ما ادري والله !
مكدرت افهم العبره من الموضوع
لا والمشكله الي جانت ناشره السؤال تكول عفيه يصير أطفئ الضوه قبل لاتخلص الاربعين لان مدا اكدر انام 😳
والي يعلقون لا ميصير لازم يكمل الاربعين 😅
هسه تكلولي عوفيهم شمسويلج قابل ! براحتهم
الصراحه هو براحتهم بس هاي جريمه بحق الساعة البايلوجية مال طفل .. هذا التصرف يخلي الطفل ميفرق ليله من نهاره .. هرمونات النوم والنمو متنفرز عدل ولا تشتغل عدل..
يعني هم بالعقل هو صارله ٩ شهور بالظلمه تجين تخبصيه بهلكد ضوه ليش ! حتى البزازين من تخلف تخلي جهالها بمكان ختله واظلم حته لاينصدمون بالتغيير وشوي شوي يتكيفون على البيئه الجديده ..
أما الي تكول علمود ابو صفار فهاي مصيبه فوك المصيبه الفوك .. يعني هم جهل وهم فتوى !
اقبح شي عندي بالوجود من شخص عنده نصف المعرفه ويتكلم بيها بترس حلكه عود هو يفتهم 😆
الي متعرف احطها على راسي .. بس الي تخرط بكيفها بودي اطعنها والله 😂
تره هاي شمعه البيت لايم ابو صفار ولاتتقرب عليه ولا اله اي علاقه بي لا من قريب ولا من بعيد ..
بس ثاوله نفسج بيها وثاوله الطفل
ذيج اضويه خاااااااصه بيها طول موجي خااااااص وغااااليات
طفي الضوء ليلا وي مغيب الشمس ورتبي نومه الطفل مبكرا .. والصبح طلعي ع شمس يتشمس تفيده وتنطي فيتامين دال .. بس مو بعز الظهريه وتسمطي 😑
وبليل طفي الضوء الأبيض القوي .. “بقي ضوء بعيد اصفر اذا تحتاجين تشوفين شي”
بليل طفي ضوه
طفي ضوه بليل
مودتي 💓
د.اسماء اسماعيل البدري
