😊دكتور احجيلنا اليوم عن الرضاعه الصناعيه
-اوكي 😏 أسالي و اني اجاوب
😎هل إعطاء مميه او اثنين للطفل راح تاذي ؟
الجواب طبعا لا
خصوصا المضطر مثلا راجعه للدوام او للعمل او او او
🙄 زين اذا ترضع صناعي و تنطي طبيعي مره او ٢ باليوم هم يفيد؟
– طبعا يفيد و خلي تستمر شكد ما تكدر لان ماكو مثل الحليب الطبيعي غني بالاجسام المضاده
😋 هل إعطاء الرضاعه الصناعيه راح تأثر على إنتاج الحليب ؟
شوفي هنا السؤال مطاط
يعني شكد تنطي
اذا مره او ٢ او ٣ بالاسبوع لا اكيد ما يتأثر
بس اذا مره يوميه و بوقت معين ثابت مثلا يوميه قبل النوم راح يقل اي إنتاج الحليب و يتأثر
🤗زين دكتور شون اعرف حليبي يكفي؟
ببساطه الوزن يزيد
اول ٣ اشهر كل يوم يزيد ٢٠ إلى ٣٠ غرام
و ثاني ٣ اشهر يزيد ١٠ إلى ١٥ غرام
بعد علامات أخرى ؟
زياده الادرار و عدد مرات تبديل الادرار
علامه أخرى مهمه انه طفلك لازك بيك
هذا هم يعني انه دا ياخذ رضاعه
بس يبقى الوزن هو اهم شي بالموضوع
🙄 زين سؤال آخر
شون اعرف ابني يحتاج رضاعه صناعيه ؟
_ أولا نبدي من البدايه
انه الطفل ما رجع وزن الولاده بعمر اسبوعين
يعني تعرفين اكيد ان الطفل ينزل وزنه اول ٥ ايام و بعدين يكبر و يرجع لوزن الولاده بعمر اسبوعين
لذلك احفظي وزن الولاده
احفظي وزن الولاده
جيكي وزن الولاده
و ثانيا الوزن ما يبدي يصعد بالمعدلات اللي كلنا عليها مسبقا
٢٠ إلى ٣٠ غرام باليوم اول ٣ اشهر
و ١٠ إلى ١٥ غرام باليوم ثاني ٣ اشهر
🤔 طيب شوكت انطي الحليب الصناعي ؟
ابدا لا تنطيه بأول شهر
ابدي انطيه بالشهر الثاني
علمود لا يصير عنده حاله اختلاط الحلمه و يكره الرضاعه الطبيعيه
☺ اكدر اخبط الحليب الطبيعي و الصناعي ؟
اي عادي شنو المشكله ماكو جريمه بالموضوع
ولو حرامات حليب كله مناعه ينخبط ويه حليب بقري
بس فعلا ماكو مشكله
😄شنو احسن طريقه انطي بيها الحليب الصناعي؟
ماكو طريقه احسن
بس افضل مو انت تنطين المميه و إنما والد الطفل أو اي احد يساعدك
🙂هل إعطاء المميه مره وحده باليوم راح ياثر على طفلي ؟
اي ياثر لان راح يترك الطبيعي
الرضاعه الصناعيه كلش اسهل للطفل و كلش من السهل عنده يعوف الرضاعه الطبيعيه و يتجه للمميه
🙂 شنو اللي اتوقعه من تغييرات اذا انطيت مميه؟
اولا مغص أكثر
ثانيا خروج لونه اغمق و اخضر
ثالثا ريحه الخروج جدا 🤢🤢🤢
رابعا نوبات إمساك أكثر
☺ اكو شي أحذر منه؟
اي نعم اذا انطيتي مميه و صار عند طفلك دم بالخروج معناها عنده تحسس حليب بقري
ارجعي للطبيعي
و استشيري طبيبك
😋 آخر نقطه دكتور ليش تشجع الرضاعه الطبيعيه ؟
– اني و الجمعيه الامريكيه لطب الأطفال و منظمه الصحه العالميه و كل الجمعيات الدوليه تشجع الرضاعه الطبيعيه لان ماكو حليب بالدنيا بيه خلايا مناعيه حيه تحفز المناعه و ماكو الطف منه على أمعاء طفلك فاللي تكدر خلي ترضع طبيعي و اللي ما تكدر براحتها
د. سيف سمير البياتي
اخصائي طب الأطفال
