الفطام !
كثير من امهاتنا و اباؤنا يتخيلون انه الفطام هو التخلص من المميه او من الرضاعة الطبيعيه
ابدا مو هذا الموضوع
الموضوع يبدي مع اول اكله تدخل لمعده الطفل بعد الحليب
سواءا قررتي بعمر ١٢٠ يوم او عمر ١٨٠ يوم او بينهما
زين شوكت افطم ؟
الرضاعه الصناعيه واضحه شوكت تفطمين سنة و ٣ اشهر اخر موعد للفطام من المميه
و الرضاعه الطبيعيه براحتك انت و طفلك
سنة؟
سنتين؟
بكيفك انت و طفلك
زين ليش الاختلاف ؟
الاختلاف هو بطريقه الرضاعه فالرضاعه الصناعيه تقدم الفك و تؤثر على الاسنان في حين الطبيعي لا يؤثر شيء
زين قررتي تفطمين نهائي شنسوي؟
اول خطوة اكطعي رضاعه الصبح
و هذه سهله
كل فتره شيلي رضعه الصبح
و اهم كلهن لا تنطين انت رضاعه
فقط اذا طلب طفلك انطي
بعدها الصبح لا تنطين الرضاعه ابدا
نقطه اخرى
اذا طفلك متعود اول ما يكعد من النوم يرضع
خلص انهضي من فراشك قبله و راح يلكه ابوه بصفه
ههههههه خوش خباثه
🔘 اكيد من ما يرضع عرضي اكل بمكان الرضعه
🔘 من يطلب الرضاعه و انت مقرره خلص الهيه بلعبه او طوبه
🔘 قللي كميه و فتره الرضاعه
يعني اذا يرضع ٨ ارقام سويها ٧
وره فتره ٦
و اذا يرضع طبيعي اسحبي الثدي و العبي ويه طفلك فتقل الفتره
❤ ندخل للمرحله الاصعب ايقاف الرضاعه باليل
هنا نرجع للبدايات
لا تعوديه ابدا ينام بصفك حتى لا تصعب هذه المهمه
اذا كان ينام بجانبك ابعديه عنك بسرير منفصل
❤ اذا تكدرين تفصلين غرفته بعد ما عبر السنه عادي افصليه
❤ ابوه يتدخل بروتين النوم يعني يحجيله قصه اة يغيرله ملابسه مو انت
❤ مو ننسى عشاء جيد و اكل قبل نوم جيد مثل قطعتين بسكت شوفان او لبن و موز
❤ لا تسوين اي نشاط يدل على الرضاعه او تنطيه رضعه
❤ لا استسلام الى الامام الى الامام
❤ من يكعد بالليل انطيه وجبه اكل و كولي خلص ماكو رضاعه طبيعيه
❤ الفطام سهل و سهل جدا لو تم بطريقه تدريجية لو فكرتي بس انه الفطام يبدي من اول اكله ما راح يصعب عليك الفطام الكامل ابدا
د. سيف سمير البياتي اخصائي طب الاطفال
from د. سيف سمير البياتي