الى متى اظل ارضع طبيعي؟
بعض الامهات يسالون الى متى ارضع طبيعي
٦ اسابيع ؟
٦ اشهر
٩ اشهر
سنه
سنتين
٣ سنين
اكثر
القرار يعود الك و ما من حق اي احد يحاسبك او يمنعك
منظمه الصحه العالميه تكول رضعي طبيعي فقط اول ٦ اشهر وراها ضيفي الاكلات المختلفه و استمري رضاعه طبيعيه لغاية سنتين
على ارض الواقع امهات تستمر و اكو لا
فشنو الفترات
اني اللي عليه كطبيب ابينلك محاسن الرضاعه الطبيعيه لكل فتره و انت اللي عليك تقررين طبعا بعد ما تسالين طفلك لان هذا حقه و حقك فقط
💜 اذا رضعتي اول كم يوم فقط فهنا انطيتي اول لقاح للطفل ( الصمغة )
السائل الذهبي الغني بالاجسام المضاده و المناعه المستمره اقل شي سنتين
💙 اذا رضعتي طبيعي اول شهر الى شهرين تكونين سهلتي على طفلك اكثر فتره ازعاجا بحياته
كل البحوث تكول انه اللي يرضع طبيعي يكون اقل دخولا مستشفيات و اقل عرضه لمتلازمه موت المهد
💚 اذا رضعتي طبيعي لمده ٣ الى ٤ اشهر تكونين حضرتي امعاء الطفل جيدا للاكل الصلب و راح يكون اكثر تقبلا للاكل و راح تحميه من التهاب الاذن و الامعاء
💛 اذا استمريتي بالرضاعة الطبيعيه ٦ اشهر راح تضمنين صحه جيده لاول سنه لطفلك و هنا راح تستفادين انت لان راح يقل خطر اصابتك بسرطان الثدي
❤ اذا رضعتي طبيعيا لغايه ٩ اشهر هنا تكونين انطيتيه احسن غذاء لاكثر فتره تطور دماغ بحياته !
💜 اذا استمريتي بالرضاعة الطبيعيه لغاية عمر السنة راح تكونين ربحتي مئات الالاف من النقود اللي تتوجه للحليب البقري
راح تنطيه فوائد العمر كله حتى مستوى الكولسترول يكون اقل بعمر ٥٠ سنه للاطفال اللي يرضعون طبيعي لغايه عمر سنه
راح تحافظين على صحه اسنانه بس بشرط تنطين فيتامين دي من اول يوم
الاكاديميه الامريكيه لطب الاطفال تكول انه لحد السنه كافيه الرضاعه الطبيعيه بعدها الموضوع يرجعلك الك و لطفلك
💙 اذا استمريتي بالرضاعه الطبيعيه لغايه عمر سنه و نصف راح تكونين حميتي من الامراض لغايه الفطام و راح يكون مستقر الطفل على اكل البيت بكل سهوله و يسر
راح تكونين انت وياه باحلى علاقه و ملتصق بيك
💚 اذا استمريتي لحد ما طفلك يرغب بترك الرضاعه الطبيعيه انت راح تكونين مرتاحه انه انت سويتي اللي عليك و واثقة من قرارك و ما فد يوم تسالين سؤال ( شنو احسن نوع حليب ) لان انت متاكده انه ماكو احسن من حليبك
❤❤❤
بالاخير اكولك سواء رضعتي ايام او سنين قرار الرضاعه الطبيعيه هو قرار لن تتندمي عليه شكد ما يطول عمرك و متى ما قررتي تفطمين راح تكون خطوه كبيره الك و لطفلك
د. سيف سمير البياتي
اخصائي طب الاطفال
from د. سيف سمير البياتي