اكو اشياء ما ترهم نسئل عليها
ليش ما تزوجتي لحد الان
ليش ما عندك اطفال
ليش ما تسوين طفل ثاني
شكد راتبك
وين تداوم
انطيني رقم تلفونك حتى من احتاجك اخابرك
ليش ما عدكم سياره
اشياء كثيرة ما لازم ندخل نفسنا بيها لاجل لا شيء و لاجل انه احنا فضوليين او حشريين او نحب نقتحم حياه الناس
المساحه الشخصيه حق و لكل شخص الحق بالرفض او القبول بدخول هذه المساحه
يمعود دكتور سهلها احنا خوات و بيناتنا و شكو بيها اذا سئلتها غير من خوفي عليها
هذه حجج مو اكثر لاقحام انفك في حياة الاخرين
من تسئل سؤال و تدخلت بحياه الاخر الشخصيه و الاخر تهرب منك ماكو داعي تلح و تزيد و تعيد و تكمل تصرفك الغير مهذب
اووو دكتور اني علي نياتي و قلبي ابيض و ما احب بس الخير للناس
بس هل ان قلبك الابيض يبيحلك تتدخل بحياه الاخر الشخصيه؟ و تاذيه و تاذي نفسيته و تزعجه ؟
ايه كريمه في القران الكريم تلخص انه اذا رحت لبيت احد و ما فتحلك و كالك ارجع فارجع هو ازكى لك
ابدا الموضوع ما يخص حريتك بالتكلم عن نفسك
شتريد تتكلم عن نفسك تكلم بس لا تتدخل بحياه الاخرين
هوايه ناس تاذوا و انزعجوا من تدخلك السافر بحياتهم و ان ضحكوا بوجهك
#خليك_بحالك
د. سيف سمير البياتي اخصائي طب الاطفال
from د. سيف سمير البياتي