الرضاعه الصناعيه إلى متى استمر بيها؟
خلينا اضوي الموضوع:
الرضاعه الصناعيه من المميه ( الببرونه ) هي فقط لغايه سنه
و هذا لا يعكس رايي الشخصي
جمعيه اطباء اسنان الاطفال الامريكيه تكول لغايه سنه
جمعيه طب الاطفال الامريكيه تكول لغايه سنه و نصف
جمعيه اسنان الاطفال البريطانيه تكول لغايه سنه فقط
اكيد السبب هو ان الببرونه تغير شكل الفم و تزيد نسبه التسوس
مو بس هاي
تعويد الطفل على المميه حتى يؤثر على تلفظ الطفل للكلمات و تؤدي الى تاخر الكلام عنده
هسه نكول اخر موعد شوكت للفطام من المميه؟
سنه و ٣ اشهر هو اخر موعد
زين شون افطم بسهوله ؟
كتبت الكثير عن بوستات الفطام النهائي من الرضاعه الطبيعيه و الصناعيه
بس لو تبدين من البدايه كلش راح يصير الموضوع اسهل
شون يعني ؟
يعني بعمر ٦ اشهر دخلي الكوب اما العادي او الكوب المثقب
و بعمر ٩ اشهر اعطي الماء بالقصبه
بعمر ١٠ اشهر ضيفي الحليب بالكوب اللي يعطى بالقصبه او بالكوب المثقب
بعمر ٩ اشهر الى ١٠ اشهر
الوجبات خلي تكون ٣ وجبات و مرتين او مره طعام بين وجبات بحيث يكون الحليب ٣ الى ٤ مرات يوميا
بعمر ١١ شهر غيري طريقه اعطاء وجبه ثانيه من الحليب باستخدام الكوب الاعتيادي او كوب القصبه او كوب مثقب
بعمر سنه انتهى الموضوع
الحليب فقط مرتان يوميا و بالكوب
و وداعا للمميه
بعد السنه غيري الحليب من حليب القواطي الى الحليب الاعتيادي على مدى شهر بالخبط بين النوعين
هيجي تحافظين على اسنان طفلك
و يكون الفطام سهل
و تحميه من فقر الدم
و تضمنين صحه افضل لمخارج حروفه و تطوره و اكل صحي اكثر
الرضاعه الطبيعيه خارج هذا البوست تماما لاختلاف طريقه الرضاعه و نوعيه الحليب
د. سيف سمير البياتي اخصائي طب الاطفال
from د. سيف سمير البياتي