من 5 سنوات
قابلت صديق اعرفه كان فاتح مشروعه الخاص الجديد و اكيد باركتله و هنيته
صديقي كان جدا متحمس و قال بالحرف انه ناوي يخلي المشروع مالته أكبر مشروع بالعراق
راقبت نجاحه من بعيد و فعلا حقق هدفه و بدا يصعد و يصعد و يصعد و فعلا مشروعه صار أكبر مشروع بالعراق
قبل كم يوم التقيته
سألته شنو الاخبار ؟
الجواب كان :
لما صرت رقم 1 و كبرت
ما لكيت شي يثير حماسي بعد
سألته عن المعنى؟
كال انه كان مسبقا عنده الرغبه يبقى الأفضل بس ما سئلت عن الخطوه اللي بعدها و ضحى بالكثير من الوقت و الجهد حتى يوصل لرقم 1 و لما وصل لكه نفسه مضحي بالكثير من وقته و صحته و أسرته
يكمل صديقي و يكول ما لكيت احد يصفق لي و لا لكيت احد يباركلي و الأهم ما عرفت شنو نوع الخطوه الجايه اللي لازم اخطوها
وزني زاد و صحتي تدهورت
اي عندي فلوس
بس اذا اتمرض اي مرض عضال كل فلوسي تروح و اصير مديون
ما كان عندي رد
و لا هو منتظر رد
بس كلتله الحمد لله عديت و حسيت باللي ضاع و بعدك شباب و تعوض
اريد اعرفكم بنهايه هذا البوست على اسلوب حياه بدا يصعد بالسنه الماضيه اللي هو اسمه slow living
لو تفتح الكوكل تلكاه نمط حياة يشجعك تعيش خطوه خطوه
بهدوء
و بدون خبصه
صرنا نكعد من النوم دايخين نركض نروح لعملنا و نرجع نريد ننام ثاني و ساعه نخلي راسنا على المخده يروح النوم و الارق يشتغل من كثر التفكير بالخطوه الجايه
نفكر باي فرصه انه ما تفوت
و انه نتطلع على كل شيء
و ان اتعلم كلشي جديد
و لازم اخذ الشهاده الفلانيه بعد الشهاده التاليه و و و
و لازم اشتغل اكثر و اربح اكثر
لازم اسوي فلوس اكثر حتى ما اصير فقير
لازم اتداين حتى اسوي فلان مشروع
و لازم أكبر مشاريعي حتى محد ياخذ مكاني
عركات و صراعات و تهافت على كل شيء و اي شيء
في حين ال slow living مطلوب منك عكس كل ما ذكر
اشتغل اي
أنجح اي
بس دير بالك على جوانب حياتك الاخرى
هوايه مننا و اني منكم تفاجئنا انه اطفالنا كبروا من دون ما نلاحظ
مبدأ ان الوقت يساوي الفلوس مبدأ خاطيء
فالوقت اهم من الفلوس
الفلوس تتعوض
بس عمر الوقت ما يتعوض
و شيل كلمه الفلوس و خلي بمكانها اي شيء مثل الشهره و العمل و النفوذ و المكانه الاجتماعيه و الجاه
فكلهن يتعوضن الا الوقت
الوقت و صحتك و أولادك
بالاخير اكولك
دوس بريك
و تأمل بالطريق
استمتع باللي تشوفه
توصل متأخر لهدفك احسن ما توصل و انت وياك مجموعه امراض مزمنه
منقول بتصرف
د. سيف سمير البياتي اخصائي طب الاطفال
from د. سيف سمير البياتي