البوست اليوم عن الصوم و الرضاعه
و راح اصيغه بصيغه الاسئله و الاجوبه
☺ السلام عليكم دكتور كيف الحال حبيت اسال عن الصيام برمضان و اول سؤال هل يؤثر الصيام على طفلي ؟
على الاغلب لا هو يشبه سؤال اني ارضع طفلي و اكتشفت نفسي حامل فهل ياثر على طفلي فالجواب لا
بس ياثر على صحتك كونك تاكلين اقل و تشربين اقل من الأيام الاعتياديه
🙂 طيب شنو ممكن ياثر عليه او شنو فرقي عن غير المرضع؟
انت تعرفين ان ٨٨ بالميه من حليبك هو ماء و ان هذا الحليب كله سوائل تفقديها
فأكيد احساسك بالعطش يكون أكثر
احساسك بالدوار يكون اشد
😃 زين اكو مرضع تفرق عن مرضع او مرضع تحس بالعطش أكثر من غيرها ؟
اي نعم المرضع بأول ٦ اشهر هي اللي أكثر يبين عليها التعب لان اعتماد طفلها كله عليها في حين اللي بعد ال ٦ اشهر راح يكون عنده نظام غذائي مستقر تقريبا
😐 طيب دكتور اني ناويه أصوم بس حابه اسال انه اكدر شي اسوي قبل ما يجي رمضان؟
اي نعم تكدرين تكملين شغل البيت و الأشغال الكبيره اللي عندك حتى تتفرغين للرضاعه و لرعايه الطفل
😐 زين شنو اكدر اسوي بحيث ما يتأثر إنتاج الحليب و يقل عندي احساس العطش؟
اشربي ١٢ كوب من السوائل المختلفه من كلشي و طبعا العصائر بدون سكر اذا تكدرين و اكيد قللي من استهلاكك للملح
☺ زين دكتور كلت في اغلب الحالات ما يتأثر الطفل شون اعرف بده يتاثر؟
من يبدي ادرار طفلك يقل و وزنه يقل و عدد المرات اللي تطلع بيها بطنه يقل معناها إذن بده يقل
🙄زين اكو طرق أخرى تساعدني ؟
اذا ابنك فوك ٤ اشهر ليش ما توكليه أكثر و شويه شويه
طبعا مو معناها الاستعجال بالفطام بس وكليه أكثر
🤗 وبعد؟
الراحه قدر الإمكان
😁 و بعد؟
ههههههه هاهيه ماكو بعد
عبالك اكول ضيفي حليب صناعي ؟
طبعا لا
افطري و لا تضيفين حليب صناعي
حليب صناعي لا شيء مقابل حليبك طبعا
🤗 تنصحني أصوم لو لا ؟
السؤال الأكثر طرحا على الاطباء و اللي نتجنب الاجابه عنه لكون السؤال يخص رجال الدين أكثر
رجال الدين يكولون انه اذا خافت على ولدها او على نفسها فتفطر و تقضيها بعدين
😊 رمضان كريم دكتور
علينا و عليكم
د. سيف سمير البياتي
اخصائي طب الاطفال
#رمضان_كريم
from د. سيف سمير البياتي