على طاري سالفة (( سويناها ومصار بيهم شي ))
بيوم من الايام طفل عمره ٧ أشهر يعاني من ضيق تنفس طفيف داخل بالردهة، الصبح بوقت فحص الاطفال كانت أمه نايمة الظاهر اما تعبانة او اهمال من عدها (مانعرف ظروفها شنو) والطفل بيده ممية ديرضع بشراهة وهو مستلقي بصورة افقية على ظهره
يعني لا اكو احد ديراقبه ولا مخلينه يرضع و جسمه شوية مرفوع حتى لا يختنك
صحيت الام وفحصت الطفل وكتبت ملاحظاتي و كلتلها ديري بالج عليه لا يختنك بالحليب
كالتلي دايرة بالي عليه، كلتلها انتي نايمة وعايفة الممية بحلكه يرضع منها وهو مستلقي على ظهره
عالاقل ارفعيه شوية حتى ما يختنك
كالت ما عليه شي دكتور
كلتلها ترى غلط هالشي وممكن يختنك ويموت واني الي علية نصحتج و نبهتج وانتي بكيفج بعد
…
وراها بساعات وصلني خبر وفاة الطفل نتيجة الاختناق بالحليب ! انصدمت
سبحان الله الصبح نبهتها و كلتلها لا يختنك بالحليب، خطية ورة ساعات توفى
.
.
ما نعرف نكول عليها تعبانة لو اهمال من عدها، الشيء الي نرفضه احنا هو العناد من قبل بعض الامهات وعدم اتباع نصيحة الأطباء، مشكلة كبيرة سببت وفاة هواية اطفال
احنا ما نربح فلوس لمن ننصح
احنا ننصحكم لخاطر الاطفال، اطفالكم امانة
خلي نشوف كم ام راح تكتب بالتعليقات، شدعوة دكتور كلنا دننطي حليب لأطفالنا وهم مستلقين على ظهورهم بلا ما نرفعهم ليفوك شوية اشو مصار بيهم شي
اذا مصار بيهم مو معناها ميصير، ممكن يصير و ميفيدج الندم بعدها
الله يحمي اطفالكم من كل شر ومكروه
—
د سلمان داود
مقيم اقدم اطفال
حساب التوعية على الانستاغرام
https://instagram.com/dr_salmand?igshid=qbd41hnknyb3
from د. سيف سمير البياتي