11 نصيحه حول الرضاعه الطبيعيه
للأمهات الجدد
او المقبلات انه يكونون امهات بالأيام الجايه
١. رضعي بأول ساعه و اول ما تحسين نفسك مرتاحه
يولد طفلك واعي و مستعد الرضاعه
اول ما تكومين بالسلامه من الولاده الطبيعيه او القيصريه
رضعي طفلك طبيعيا
٢. غيري طريقه الرضاعه بكل مره لان الغرض انه انت و طفلك ترتاحين
شوفي الصوره
اهم شي بعدي طفلك عن الجرح اذا كنت والده بعمليه قيصريه
٣. رضعي طفلك كلما يريد
ماكو شي اسمه كل ساعه او كل ساعتين
كلما يريد
و لا تنسين لا تخلين ٤ ساعات تعبر بدون رضاعه اول اسبوعين وراها اتركي طفلك ينام شكد ما يريد
يستثنى من هذه القاعده الأطفال المرضى و المولودين ولاده مبكره فحسب طبيبك
٤. اذا بعده حليبك ما نازل بصوره كافيه
فكعدي طفلك يرضع حتى ينزل حليب
لا تنسين القاعده كلما طفلك يرضع أكثر كلما يزيد إنتاج الحليب
٥. لا تقلقين و لا تخافين من جمله عمتج تسواهن من تكولك حليبك مو كافي او حليبك خفيف
الحليب كافي و تكدرين ببساطه تعرفين هالشي من خلال عدد مرات الادرار
اللي هي تتراوح بين ٥ إلى ٦ حفاظات يوميا
٦. تأكدي من التصاق طفلك بالحلمه طبيعي و مثالي
اسهل طريقه انه تخلين الطفل يفتح حلكه بالكامل و تدخلين الثدي
٧. لا تقبلين و لا تدخلين اي رضاعه صناعيه او اي ملهيه بأول شهر
٨. اكلي هوايه
اكلي هوايه و بتنوع
بالأخص الشوفان
الاوراق الخضراء
الفواكه
٩. ارتاحي ارتاحي ارتاحي
و قللي شدك النفسي و العصبي
هرمون الحليب لا يفرز الا اذا كنت مرتاحه
١٠. لا تهملي الألم
سواء الم العمليه القيصريه او الم الرضاعه الطبيعيه
و راجعي اقرب طبيبه و اساليها عن العلاج ولو اني منزل بوست عن موضوع تشقق الحلمه
١١. اخيرا
اطلبي المساعده من زوجك من والدتك او من اي احد
محد كال ان الرضاعه الطبيعيه سهله
بس نحاول نسهل المهمه
قدر الامكان
د. سيف سمير البياتي
اخصائي طب الأطفال
