احيانا نسيء فهم بعض الاشياء الطبيعيه و نقنع نفسنا انه هي سبب المرض
يعني شون ؟
مثلا
الطفل من العادي انه انفه يصير بيه صوت مثل صوت الخنفرة و لحد ٦ اشهر
المو عادي انه اكول انه الطفل شارب مي راس او نشله نفاس او ما سحبوله مي الراس
لان مي الراس يحيط بكل طفل بالدنيا و اني و انتوا كننا سابحين بمي الراس و من طلعنا للدنيا انشفط من تلقاء نفسه او سحبوه النا
بس مال يبقى اكثر من يومين
هذا مو مي راس هذا لزكه جونسن يا يمه
.
.
اختلاف الدم نوع اخر من المشاكل المفتعله
اختلاف الدم من يكون دم الام سالب
و هذا مشكلته الوحيده بابو صفار ممكن يكون شديد
المو عادي هو من يتمرض الطفل و العمه تكره مره ابنها تكول دكتور دمها ما متطابق ويه ابوه و صار بيه فلان مرض
او يتصورون انه اذا الدم موجب للاثنين يعني كانما انطيت مناعه للامراض الوراثيه !!
في حين الموضوع ما يتعدى الابو صفار لا اكثر
.
.
مشكله جديده بعد فحص الغربله
انه سويت الفحص و طلع عنده مرض وراثي مثل الثلاسيميا او تشوه القلب الولادي او او او
و الاهل يكولون ليش مو سوينا غربله !!
شوووون
الغربله تفلتر بعض الامراض مو كل امراض الدنيا
الغربله الحكومي تفلتر ٣
و الاهلي تفلتر ٧ امراض
و اكو غربله تشمل اكثر من هيجي ل ٤٠ مرض وراثي
و هم ما تخلص قائمه الامراض
.
.
اعرف البعض يطلق هذه الاحكام قصدا لايذاء الاخر نفسيا او لمجرد اللوم
و قسم اخر فعلا ما عدهم معرفه
لذلك حبيت اوضح
لكل مرض استقصي الحقيقه و اعرف كيف يكون
#مي_الراس_كلنا_نشربه و كلنا ننخلق بيه مثل الصورة
د. سيف سمير البياتي
اخصائي طب الاطفال
