كم اشاعه صغيره بخصوص الاطفال احب افندها
🤣 فيتامين دي ينطي بعمر شهر او شهرين او ٣ اشهر او ٦ اشهر ❌
خطا فيتامين دي ينطي باول يوم و استمري عليه ع الاقل سنتين للاطفال اللي يرضعون طبيعي او اغلب رضاعتهم طبيعي و يترك قرار فيتامين دي للي يرضعون صناعي لطبيب الاطفال اللي تراجعوه
😇 طلعت اسنان الطفل بعد ما يحتاج فيتامين دي ❎
خطا فيتامين دي ننطيه علمود المناعه و بناء العظم مو حتى نطلع الاسنان
🙂 فيتامين دي نزيده كل شهر قطره ❎
جذذذذذب و الله و ماكو هيجي جرعه فيتامين دي ينطي بجرعه ٤٠٠ وحده دوليه تحت السنه و ٦٠٠ وحده دولية فوق السنه
🙃 طقطقه المفاصل تعني نقص فيتامين دي ❎
ابدا و لا تعني شيء اصلا و هي شغله عاديه
☺ ابني مصخن اغطيه اكثر حتى تفكه الصخونه ❎
خطا الطفل يحتاج الى الراحه و التبريد باستخدام المروحه اذا لزمته البارده نغطيه
😤 الحليب و الموز ما يصير ينطون سويه ❎
اي لعد لا تسوين كيك موز !!
ماكو هيجي منطلق و لا كذبه
الحليب و الموز يمكن اعطاؤهم سويه
و اني بالبيت انطي للاولاد عادي
☺ السمك و اللبن مو زين و يسوي بهاق ❎
اصلا ما يحلى السمك بدون لبن
😙 الحليب و اللبن و الجبن ممنوع قبل السنه ❎
نصف خطا الحليب الكامل الدسم او حليب الاكياس او حليب البقر الطازج ممنوع قبل السنة
اللبن ممكن ينطي بعمر ٦ اشهر
و الجبن ممكن بعمر ٨ شهر
😢 بالاربعين وكلي الطفل ❎
حرام عليك و الله راح يكره الاكل و يكرهك همات
الاكل بين ١٢٠ يوم الى ١٨٠ يوم حسب شروط معينه
😙 يصير اخلي بيض ني ويه المميه ❎
من الممكن جدا تلوث البيض بجرثومه السالمونيلا ممنوع ممنوع منعا باتا اعطاء البيض نيء
😢 اخلي عسل للحليب ❎
العسل ممنوع تحت عمر سنه
د. سيف سمير البياتي
اخصائي طب الاطفال
