اخر خطوه بالفطام !
و كبر الطفل و وصل لعمر السنه و قررنا نفطم نهائي و خلص
فما عاد الحليب يكفي
و لا عاد الطفل محتاج كميه الحليب اللي احتاجها بالسنه الأولى
و قررنا نفطم للطفل هاهيه
خلينا نقرر متى نفطم !
الرضاعه الصناعيه هاهيه سنه
و الرضاعه الطبيعيه حدها لغايه سنتين
بس اذا حابه للسنه فهذه ظروفك و انت اعلم بيها و حتى رب العالمين يكول لمن أراد أن يتم الرضاعه يعني الموضوع يخصك وحدك
اما الرضاعة الصناعيه فعمر سنه جدا كافية
❤ اولا الفطام صعب ؟
اي صعب و لا اي احد يكولك يكول سهل
بس كتبت خلال سنين طويله بوستات عن الفطام و كل الأمهات اللي مشوا على ما كتبت كانت النتائج مفاجئه بالسهوله
❤ شون يسهل الفطام ؟
نقطتين راعيهن بالفطام
اولها التدريج
و ثانيها لا تصدمين الطفل
التدريج سهل
و نبدي ويه اول وجبه طعام للطفل
اني دائما ضد مبدأ ننطي الطفل وجبات صغيره او مثل ما يكولون أهلنا ( نلطعه للطفل )
لا المطلوب هي وجبه تدخل بنص الوجبات
و لا تبدين بالسيريلاك
ابدي بطبخك يا شاطره لان نريد نعلمه ياكل اكل بيت
و ابدي زيدي الوتيره
بعمر ٤ إلى ٦ أشهر يتغدى
و بعمر ٦ أشهر يفطر و يتغدى
و بعمر ٩ أشهر يفطر و يتغدى و يتعشى
و بعمر سنه يفطر و يتغدى و يتعشى و وجبتين فواكه او سناك
❤ راح تبقى وجبات الليل بهذا التسلسل و هي اخر وجبه تنفطم
ℹ️شلون نفطمه من رضعات الليل؟
✔️نبدي اول شي ياكل وجبه زينه بليل🥗 (عشاء مشبع وصحي) ويرضع 🤱وينام 💤.. من يبدي يكعد نحسب كم مره🖐️ .. ونبدي نقلل.. بالتدريج اذا جان يكعد ٥ مرات بليل اول ليله نسويها ٤ ..
ℹ️شلون نسويها ٤؟
☑️ومو كل ما يكعد نرضعه.. يعني نختار وحده من المرات بس نطبطب ونهدي ونحاول ينام بله رضعة..
✳️ثاني يوم ننقص رضعة لخ ونخلي ينام بدون رضعة ايضا..
✴️ وممكن عمل هالخطوات ببطا اكثر .. يعني كل ٣ ايام ننقص رضعه أو كل اسبوع كل ام والي تشوفه مناسب..
إلى أن يوصل مرحله بعد ماكو بليل حليب ويتعلم من يفز يغفى اسرع وبدون طلب حليب..👼💪
📌📝الخطوة الثانية .. الفطام الوقتي بالنهار..⏳
يعني اذا جان متعود الصبح 🌅 اول ميكعد يرضع نلغي هاي الرضعه ومباشره على الريوك..🥣🍳 ونكوم نزيد الساعات بين كل رضعه ولخ..
هاي الخطوه تصير وره عمر السنه وأيضا بالتدريج يعني مثلا:
اول شهر كعد ب٩ ماكو رضاعة لل١ ظهر
ثاني شهر لل٢ ظهر
ثالث شهر ل٣ ظهر.. وهكذا..
ℹ️زين شلون ناخر ؟
☑️ باللعب والأكل والتسليه ..
📌📝بعدين نجي لخطوه تقليل الرضعه نفسها.. اذا يرضع ١٠ دقائق نسويها ٨ مثلا.. وراها نلهي🤹 أو نلعب غميضه بحيث ينسى.. أو نبقى نحضنه ونضحك وياة
وممكن بدون هالخطوه اذا جانت الرضاعة للنوم لان حينام راسا..💤
♦️حتبقى اخر شي رضعة النوم ..
📌📝نجي لهاي الخطوة قبل الاخيره الي هي فصل الرضاعة عن النوم.. 🚧 يعني يرضع بس مينام راسا.. وهاي اصعب شي بس هي اخر شي تقريبا 🔚…
ℹ️شلون نسويها؟
☑️مثلا نغير مكان الرضاعة.. يعني من ينعس ويريد ينام ومتعود يرضع نجرجر وياه بحيث كلش ينعس.. ونأخذه بالهول بمكان هوسه📶 وضوه 💡ونبقى نحجي وياه 👄بحيث حيرضع بدون مينام 👀 بس يشبع راسا نشيله ونحطه بالفراش 🛌وتخلي ينام 💤بفراشه مو ع الصدر..🤱
او نحجي وياه أنه اكو قصه قبل النوم😍 بحيث يرضع وراها يتمدد بفراش يسمع قصة🎒 ويغفى..🤗
أو باستخدام الهز، (فتره مؤقته)
أو باستخدام لعبه (ينام وياها )
إلى أن يتعلم بسهوله ينام بدون رضاعة 💪👼..
اخر شي الفطام النهائي 🏁من هاي الرضعه وحيكون سهل جدا أنه نجرجر ونغلس عليها , ونوكله زين🍱🥘 وحينعس حيل 😴ونحطه ونحجي القصه وينام .. 😍
وعاشوا عيشه سعيده .. 🏆
وراها اذا طلب حيكون الجواب سهل نكله: حبيبي صار جبير رجال وبعد ميريد ميمي 🤩😍
بمناسبه عادي للبنيه نفس الشي 😅 نكلها صارت بنوته جبيره وحلوه ومو مثل النونو . 😍🤩
بالنسبة لفطام الممه 🍼 فهو من عمر ٦ اشهر يبدي يشرب بكوب الاطفال..🥛 ولعمر سنه تارك الممه نهائي🍼🚫 ويشرب بالكوب المخصص لعمره.. اي مده اكثر حتخلي يتعلق اكثر وتصير عناد📛 وتتلف اسنانه😬 ويستسلها وحته يترك الاكل علمودها.😐
🌟ملاحظات مهمه جدا:🌟
1️⃣التحدث مع الطفل عن هذه المرحلة بوقت مبكر.. 🗣️(لتكولين ميفتهم) وشوفي صور🖼️ اطفال كبار وكليله انت حتصير جبير مثلهم وبعد ماكو ميمي لان الميمي بس للصغار..👶 وحيتشوق لهاي المرحله 😄ويحس بنفسه كبر من يصير الوقت وتكليله انت صرت جبير وبطل ورجال وبعد ماكو ميمي .. تذكر من جنت اكلك رح يجي يوم وتصير جبير..(هالشي حيخلي يتقبل الفكره اسرع)💪
2️⃣طوال فتره الفطام نكثر من الاحتضان💕 والقبلات والتلامس الجسدي (الضم) تعويضا عن الاحتضان الي يصير تلقائيا وقت الرضاعه لان هواي اطفال تفتقد الاحتضان ويدور رضاعة بحثا عن الحنان وليس عن الشبع بالحليب.
3️⃣رح تجي فترات يكون ملتهي بيها(فوق عمر سنه و٦ اشهر) ميحتاج نذكره تعال ارضع نخلي الرضاعة وقت هو يطلب فقط
4️⃣فيما لو صار احتقان بالصدر ناخذ الاعشاب الي تقلل للحليب مثل النعناع والميرمية🌿🍀 ونخلي أوراق ملفوف( لهانه) بداخل الحماله (ملامسه للصدر) واذا صار مؤلم عادي تكدرين تفرغين منه إلى أن تحسين بتحسن(بس لاتفرغي كلة) وماكو داعي للعذاب. 😧 رح ينشف لتخافين🙁 .. مجرد يأخذ فتره ويعرف الجسم الطفل مديرضع يكوم يقل الحليب بالتدريج 📈إلى أن ينقطع 🛑..
بس مو شرط تكومين تلوبين وتصخنين يلا ينقطع.. اخذي الأمور ببساطه.💆♀️
5️⃣ممنوع منعا باتا تعنيف الطفل إذا طلب الرضاعة أثناء الخطه أو حته بعد الفطام تكلمي معاه بحب وحنان 👩👧👦وتاكدي طلبه للرضاعة هو بالحقيقه طلب للحب 💕والاهتمام منج فإذا حصل عليها رح ينسى مباشره.
6️⃣ماكو قانون صارم ⛓️..خليج مرنه💪 وطولي خلك 😊ومو نهايه العالم اذا صار عمره فوك السنتين بشهر او شهرين وبعده منفطم .. عادي اخذي وقتج ..⏲️
8️⃣اذا صدف تمرض الطفل😷🤒 اجلي الخطوات الكبيره
9️⃣اكثري من اللعب والطلعات وي الطفل 🏌️♂️🤽بهاي المرحله حته يصرف طاقه🤜 والنوم يصير اسرع واعمق. (نوع الطلعه لمتنزه🏕️🏝️ أو حديقه 🎡🎢ويلعب طوبه🏀 أو ركيضان مو يروح لبيت جدو أو خاله ويكضيها كبال التاب)
🔟رحلة الرضاعة الطبيعية 🤱جميلة جدا😍 عيشيها بتفاصيلها 🕵️♀️لان رح يجي وقت تفتقديها وتذكرين اللحضات الجميلة.. وهالشي نفسه للطفل فلا تسلبي منه هالشعور الجميل وتختميها بذكريات سيئه مثل تحطين فلفل حار 🌶️وصبغ ومدري شنو وتخوفي 😑👊
كتبها لكم جهد مشترك بين
د. سيف سمير البياتي
و د. اسماء البدري
from د. سيف سمير البياتي