اضطراب الدورة الشهرية للمراهقات
كثير من الامهات يزوروني بالعيادة بسبب عدم انتظام الدورة الشهرية لبناتهم الي بعمر المتوسطة والاعدادية
اكو اسباب وظيفية واكو اسباب مرضية يعني شنو
يعني اجسامنا مو الات وابد ماكو تحول من مرحلة عمرية الى مرحلة عمرية اخرى فجاة لازم اكو فترة تكيف وتغيير تدريجي ومن ضمن هالشي التحول من طفلة الى امرأة بالغة ميصير بيوم وليلة فجزء من هالشي خلل بالدورة لان الايعازات المنتظمة من هرمونات الدماغ للمبيض وبعده الرحم تاخذ وقت ممكن وحدة تنتظم دورتها من اول اشهر وممكن وحدة تبقى سنتين تلاثة واربعة دورتها ممنتظمة
اهم شي نتاكد احنه ك اطباء من عدم وجود علامات تكيس المبايض والسمنة وعدم وجود خلل تشريحي بالجهاز التناسلي وتحاليل الهرمونات والغدة الدرقية سليمة
ذاك الوكت نبدي علاجات بسيطة يعني مكملات غذائية ممكن نضيف علاجات تقلل تدفق الدورة بغزارة حتى ليصير فقر دم بس رجاء نبتعد عن منظم الدورة خصوصا بالبداية لان رح تغطون بي على اي سبب وظيفي او مرضي ومرح نعرف المشكلة شنو
انت ك ام تابعي وقت الدورة ومثل مكلت مو شرط تنتظم من البداية بس المهم متصير البنت فقر دم بسببها
تابعي مواعديها ايامها اعراضها
انتبهي لاكل البنت وقللي توترها بسبب التغيرات الجسدية والدراسة لان اغلب الي يعانون من هالمشكلة تكون شاطرة وحريصة وقلقة وهذا التوتر ينعكس على دورتها الشهرية
تققل حلويات واكل من بره نزيد خضار وفواكه ونوم عدد ساعات كافية
ننتظر الدورة تنتظم الى عمر ال١٨ سنة اذا كانت كل الامور الاخرى طبيعية
دمتم بالف خير
د رحاب مجيد شريف
https://www.facebook.com/Dr.Rihabmajeed
from د. سيف سمير البياتي