الانفلونزا
شكلها ضربتنا مبكرا هالمره و حتى قبل اللقاحات مال الانفلونزا
حالات الحراره العاليه و الرشح و السعال و الاسهال الحاليه هي اغلبها حالات انفلونزا
طبعا الكثير الكثير يتفاجا من يعرف انه الانفلونزا تسوي اسهال او قيء
الانفلونزا كلشي تسوي فعليا
فهي تسبب تعب و ارهاق و ضيق نفس و سعال و الم عضلات و حراره و اسهال و قيء
الانفلونزا مرض فايروسي حاله حال الامراض الفايروسيه الاخرى
الحراره تظل بيه مرتفعه ٧ الى ١٠ ايام و احيانا الى اسبوعين
و السعال و التعب و الخمول يظل مستمر اكثر من هيجي
فتره الحضانه قصيره يعني من يدخل عدكم خطار و عنده انفلونزا
راح تبين عدكم او عند طفلكم خلال ساعات
العلاج هو الراحه و السوائل و خوافض الحراره لا اكثر
المرض فايروسي مهما اشتد
خلي الطفل مرتاح
و اذا بس يلعب اطلب منه يرتاح
و خافض حراره بسيط مثل الباريستول بمختلف تسمياته
و اهم من كلهن السوائل
فانطيه الكثير الكثير من الماء و الشاي و الحليب و لا تنسى العسل كمثبط للسعال
اما الوقايه فهي تعتمد على الشخص المصاب اولا
يا عيني من يصير عندك انفلونزا لا تطلع و البس كمامه و لا تروح خطار
و الكثير الكثير من مراجعيني يكولون و الله دكتور زارونا خطار بيهم انفلونزا و انتقل للاطفال
و الله يا اخي كاعد تكسب اثم غير مقصود
تتمرض مو الا تسوي الواجب
من طرق الوقايه الاخرى هي كثره غسل اليدين
و تهويه البيت
اخر شغله مو كل طفل او بالغ اشتكى من حرقه بالبلعوم معناها عنده التهاب لوزتين
حرقه البلعوم تسببها الانفلونزا كذلك
تمنياتي الكم بشتاء خالي من الانفلونزا
د. سيف سمير البياتي
اخصائي طب الاطفال
