العين الكسولة
🔳 شلون تكدرين تفحصيه؟ سدي وحدة من عيونة بإيدك، كل مرة وحدة وشوفي ردة فعلة! رح ميقبل اذا غطيتي العين الزينة ورح يدفع ايدك، اما اذا غطيتي العين الكسولة فمارح يسوي شى.
🔳 الدماغ بالطفولة مرن بالتعلم، فالطفل اللي تشخص من وقت وتعالج يحصل نتائج أحسن. أفضل النتائج للي عمرهم اقل من ٨ سنوات. وممكن لحد ١٧ سنة بشروط خاصة.
🔳 العلاج مختلف فلكل طفل نظام خاص يعتمد على السبب + شدة الكسل + العمر. الهدف هو زيادة الإعتماد عالعين الكسولة لتحفيزها.
الحلول كالتالي، مرات اكثر من طريقة بنفس الوقت:
✅️ النظارات. عادة هل الحل بدون إجراءات اخرى لكثير من الحالات.
✅️ غلق العين. نغلق العين الجيدة، وتعتبر الطريقة الذهبية.
✅️ قطرات. تستخدم لكسل العين البسيط والمتوسط و من ماكو التزام بالغلق.
✅️ تشويه الرؤية. نوصف زوج من المناظر، احدها حسب الوصفة والاخرى بديل للغلق بدرجة مخالفة او بوضع لاصق شفاف خاص على عدسة النظارة للعين الجيدة.
✅️ تمارين. بالجديد دنتجه لتمارين تطبيقات الاجهزة الذكية. بعضهة بفوس وبعضها ببلاش مثلAmblyoPlay + tertis + GamE-blyopia
✅️ الليزر. للان “لاغراض بحثية” لان بيه مشاكل بالاطفال بس ممكن يفيد الكبار من اكو عين وحدة بدرجة عالية (يصحح مثل الدرجة بالمناظر).
✅️ نظارات العالم الافتراضي VR. لكو بعض البوادر في اخر البحوث انه ممكن تحسن تعاون العينين في حالة الكسل للكبار.
✅️ جراحة. من اكو ماء ابيض، هطول جفن، عتامة بالقرنية، او حول شديد.
🔳 شكد الوقت؟ هم يعتمد على عمر الطفل وشدة الكسل، بعضها قد يستمر لعمر ١٤ سنة واكو جزئي طول فترة الشباب لان بنسبة ثلث ترجعلهم.
🔳 عدم الاستجابة؟ كثير من الناس تشتكي من عدم الاستجابة للغلق لان ماكو التزام. طبعا الطفل ميحب تنغلق عينة القوية و يدل إنه التشخيص صح. اول ١٥ دقيقة بعد الغلق هي الصعبة، حاولوا تكونون يمة بيهة. ممكن تربطون غلق العين بجائزة للطفل. اذا بنوتة فجيبو للعابة مالتهة غالقة عين وفهموهة شكد حلو. او خلوه يسوي ديكور للغالقة مالتة. اذا مفاد فممكن تلبسوه جفوف او جواريب على ايدة.
🔳 الوقاية. دائما هي انجح من العلاج، الفحص الدوري مهم. نبدأ عند الولادة وبعدها بعمر ٦ اشهر و سنة، بعدها سنويا الى عمر ٦ سنوات.
⚠️ نصيحة: لا تحاول تعالج العين الكسولة بدون طبيب لانه سلاح ذو حدين، ممكن تفقد العين الجيدة.
#د_صهيب
د. صهيب علي جواد
أخصائي طب و جراحة العيون
https://www.facebook.com/dr.sohaib.vision/
from د. سيف سمير البياتي