المرض الثاني شيوعا بعد الانفلونزا بهذه الفترة هو التهاب الحنجرة
او الكحه الحنجرية
و بالانكليزي كروب
Croup
هو مرض مو كلش بعيد عن الانفلونزا يسببه فايروس اسمه باراانفلونزا
هذا يضيق مجرى التنفس العلوي و يسبب كحه شديده تشبة نباح الكلب
اسمه العلمي هو التهاب الحنجرة
و المميز اله انه الصوت يصير ويه الشهيق عكس التحسس او الربو اللي يصير ويه الزفير
الاعراض يبدا برشح عادي كانما نشله عاديه بس يرافقه حرارة دائما و بعدها يصير الصوت المميز
ماكو شي يكدر يتنبا بانه راح تصير هذه النشله خناق
الاعراض ككل تبقى من ٣ الى ٧ ايام و تروح وحدها
بس الحالات الشديده تحتاج علاج
الخناق يصير باعمار صغيره اقل من ٣ سنوات غالبا
المضاعفات قليله و نادره بس نحتاج احيانا دخول المستشفى في حاله استمر الصوت هذا
الوقاية:
حاله حال اي فايروس تنفسي
كمامه
غسل اليدين
و العزل
و عدم الذهاب للروضه او الحضانه
المرض ماله لقاح لا بالعراق و لا خارج العراق
شنسوي اذا صار بالطفل خناق؟
اولا نراجع طبيب
احيانا كل اللي يحتاجه الطفل راحه و حمام بخاري لما تعدي الاعراض
احيانا يحتاج ندخله طواريء علمود بخاخ ثلجي بالادرينالين
اذا عدنا بالبيت المنقذ او البخاخ ممكن نسوي بماده البلميكورت البخاخ القرص
و اكثر علاج نافع هو الدكسون او الدكسن شراب او ابر حسب الجرعه اللي دائما تكون عاليه حتى تفتح الحنجرة
اكو ممنوعات على الكروب او التهاب الحنجرة ؟
🚫 ماكو داعي للمضاد الحيوي .
🚫 التبخير بالفنتولين ممنوع على مريض الكروب
🚫 البروفين و الفولتارين و البونستان ممنوع على مريض الخناق
.
.
حالات نشك انه الموضوع مو كروب هي :
⭕بدون ارتفاع بدرجه الحراره/رشح/نوبات
⭕في غير المواسم الي تكثر فيها حالات التهاب الحنجرة
⭕تكرارها اكثر من مرتين بالعام الواحد
⭕استمرار النوبة أكثر من المعتاد.
⭕عدم الاستجابه للعلاجات التقليديه لالتهاب الحنجرة
⭕حدوث التهاب الحنجرة بالأطفال الاقل من ٣ شهور او اكبر من ٣ أعوام
هنا نراجع الطبيب و نشوف اذا كان الموضوع يحتاج فحص من قبل طبيب الانف و الاذن و الحنجرة لان ممكن يكون السبب جسم غريب او شي اخر غالق مجرى التنفس
د. سيف سمير البياتي
اخصائي طب الاطفال
