خطوط عامه لعبور اول شهر من عمر الرضيع !
عبور الشهر الأول من العمر مو بس صعب
لا صعب جدا و شاق جدا
تخيلوا بطب الاطفال ندرس خدج تقريبا سنه من اصل ٤ سنوات البورد !
فكيف اول شهر !
يلا نستعجل و نتعلم شلون نعبر اول شهر من عمر الطفل !
❤ كوني جاهزه من فتره الحمل
كلشي جهزي من فتره الحمل
ورقه و قلم و سجلي شنو تردين
مكان الولاده
طبيعي او قيصري
فيتامين K بأول ساعه
فيتامين d
راح ارضع طبيعي ما راح احضر مميه
منو طبيب الاطفال اللي اراجعه
محرار
شنو فصيله دم الطفل اذا دمك سالب او O
و الأهم تجهزي بالعلم و قولي لا للخرافات
فالخرافات تكثر حول هذا العمر و السبب واضح
ان هذا العمر ما يتكلم و لا يسولف
اعرف هوايه منكم ولادتهن طارئه بس الاغلب مقرره
❤ خلي تجهيزات الطفل بكل غرفه اذا البيت كبير
او بالطابق الأرضي و الاول اذا ساكنه فوك
مهم جدا ان يكون عندك خزانه صغيره بيها أغراض الطفل
❤ قولي نعم للملابس السهله بالتغيير
السحابات
السحابات
و الكثير من السحابات
ما عندك اي وقت إضافي للازرار
❤ اطلبي المعونه لا تخجلي من ذلك
والدتك
زوجك
عمتك
اي احد
اي جهد يشيل عنك اطلبيه
❤ عبري عن مشاعرك
أتفهم جدا مشاعر الأمهات اللي يعانون كابه الحمل
كابه الحمل تشمل الكثير من الأمهات
هي تلك الدموع اللي تنزل بلا سبب
هي تلك الخنقه بالقلب
شاركي مشاعرك
انت مكتئبه
شاركي ذلك مع زوجك
❤ اخذي وقت مستقطع لنفسك
الطفل مو مسؤوليتك لوحدك
تنفسي بعمق
شوفي مسلسل
اقري كتاب
❤ قللي من سقف طموحاتك
الكمال لله وحده
ماكو طفل ما يبجي و هاديء و مطيع من اول يوم
❤ تناولي طعام صحي
و أكثري من الفواكه و الخضراوت الغير منفخه
❤ خليك نشطه
قولي لا للكسل
اذا تلعبين رياضه يلا
و اذا تحبين تتمشين اطلعي
اذا تحبين السوق روحي
نفسيتك بالدنيا كلها
❤ اخذي اغفاءه من طفلك يغفى
مهم جدا ان تنامي
و الوقت المستقطع القصير مفيد
❤ استخدمي خماسيه دكتور Karp’s
S = swaddle
يعني كمطي و تعلمي الكماط الصحي اللي ماله علاقه بالساقين
S = sie or stomach position
اي وضع الطفل على بطنه راح يساعده على الراحه بس شرط أن تكونين مستيقظه
S = shush
اللي هو صوت اشششش او استخدمي الضوضاء البيضاء مثل السشوار
S= swing
اي الهز اللطيف و اللي يذكر طفلك بالرحم
مريح و يضمن نوم هانيء للطفل
S = suck
اي الملهيه و هي تساعد على النوم و تقلل الغازات
❤ قطرات السيمثكون جيده و اذا ما فادت استخدمي قطرات الكوليف
❤ الاطفال المرتبين هم الاطفال اللي يترتبون مبكرا
لذلك رتبي وقت طفلك
نوم و رضاعه و كلشي بوقت
طبعا ما نقصد انه جدول
بس خلي يكون كل شيء بوقته
❤ علمي الصغير على النهار و الليل مبكرا
ابدي من اول ايام تعلميه كيف النهار
و كيف الليل
كيف ان النهار مضيء و بيه حركه
و كيف ان الليل مظلم و بدون حركه
❤ تعلمي كيف تضعين طفلك في فراشه صاحي و هو ينام وحده
من أهم الخطوات هي هذه
ان لا تربطين الرضاعه بالنوم ابدا
❤ تحضري لطفرات النمو
فالطفل لا ينمو بمعدل واحد
فبعمر ٣ اسابيع سوف يرضع كثيرا و يتقيء كثيرا
و بعدها بعمر ٦ اسابيع
و بعدها بعمر ٣ أشهر
❤ اخيرا تمهلي على روحك
فأنت لا تعرفين كل شيء
و الامومه صعبه
اتركي كوكل
و ركزي على إيجابيات حياتك و بلا الظنون السيئه و التفكير اللي ماله داعي
د. سيف سمير البياتي اخصائي طب الاطفال
from د. سيف سمير البياتي