دا توكلين اولادك و ما شاء الله و الامور طيبه و انت ماشيه صح و ياكلون زين و يخلصون مواعينهم و تنطيهم اكل منا و منا من بعض النساتل او الحلويات بس مره او مرتين باليوم و عايز بس ياكلوك
و انت فرحانه و الامور اوكي
جتي جارتك تزورك كالتلك شو جهالك مصوفرين و بنتك شو شعرها عكش و صفره
و كملتي الجلسه و شكيتي الها انه هوايه يتمرضون الجهال
هي كالتك شدعوه هلكد يتمرضون شو اني جهالي و لا يتمرضون
و راحت جارتك و طلعت
و ظليتي تلومين بنفسك هاي ليش و شون و كيف ؟
لعد و الاكل وين دا يروح
شو صدك مصوفرين الجهال
خلي اروح اوكلهم بعد و اجبرهم بعد
.
.
بس الموضوع ابدا مو هيجي !
الموضوع اله علاقه بالنوعيه مو بالكميه
انت ما كاعد تنطين الوجبات المتكامله!
🤔 الوجبات المتكامله؟
الوجبات المتكامله هي اللي تشمل اربع اصناف الطعام
1. النشويات او الكاريوهيدرات و هاي شاطرين بيها و ننطيها بكثره مثل الرز و البطاطا و الخبز و الصمون و الذره
2. البروتينات و هذه ننساها مع كل الاسف مثل اللحم و الدجاج و البيض و البقوليات
و اكو مجرمات مو امهات ما ينطون للطفل لحم بحجه يسوي دود بدون اي داعي و الطفل يجي اصفر شاحب عبالك هيكل عظمي
3. الالبان و اللي تشمل الحليب و اللبن و اللبن بفوائدها الكثيره و اللي نفرط بيها في بعض الحالات و المحصله فقر دم
4. مجموعه الفيتامينات و ذني الفواكه و الخضراوات
قسمي الوجبه على هذا الاساس
الصبح مثلا خلي نسوي فطور
نجيب حليب من رقم 3
و بيض من رقم 2
و صمون او خبز من رقم 1
و نجيب خيار او طماطه من مجموعه رقم 4
هيجي نكون قسمنا الوجبه على الاربع اصناف
شنو الغايه انطي للطفل اندومي مثلا و انطيه بس نشويات !! و ماكو لا صنف اخر !
العشاء مثلا سويتي جبن و قطعه خبز
و البروتين وين؟
خلي دائما خياراتكم صحيه
قسمي الوجبه على ٤ و راح تلاحظين فرق بصحه اطفالك
اكطعي السكريات و العصير صناعي او طبيعي
الحلويات و النساتل و الجبس شنو بيهن غير نشويات نشويات نشويات
قدمي الفواكه بين الوجبات و اضمني اكل الفواكه مو شرب عصيرهن
هذا البوست لا يشمل الاعمار الصغيره فقط
بل يشملكم و اهم بكثير من الفيتامنيات الصناعيه
شوفوا اللي يتمرضون بكورونا يكولون اكلوا صحي فاكلوا صحي حتى نقاوم الكورونا
د. سيف سمير البياتي
اخصائي طب الاطفال
