شنو هي اسباب فقر دم نقص الحديد ؟؟
فقر دم نقص الحديد سببه عادة 4 شغلات:
1️⃣ نظامك العذائي يكون الحديد بيه قليل:
مثلا الاشخاص اللي ما يأكلون شغلات بيها حديد هواية مثل اللحوم ، البيض، الخضروات الورقية الخضراء،… الخ
2️⃣ انه كمية الحديد باكلك زينة، بس جسمك ما يمتصها زين وما يستفاد منها، مثل:
◀️ مرض سيلياك اللي هو سببه انه الجسم ما يقدر يتحمل الغلوتين بالاكل.
◀️ امراض الامعاء التقرحية مثل مرض كرونز و التهاب الامعاء التقرحي.
◀ ️عمليات قص المعدة و تحويل المسار.
◀ ️الاستخدام المزمن للادوية المضادة للحموضة.
◀️ الامراض اللي يكون الجسم بيها بحالة التهابية مثل امراض الروماتيزم، عجز الكلى ، والعديد من الامراض الاخرى.
3️⃣ انه انت دتخسر الحديد والدم عن طريق النزف:
❤ ️الدورة الشهرية اذا كانت كمية الدم المفقود بيها هواية، او انه تطول اكثر من الطبيعي او تجي اوكت من الطبيعي.
❤️ قرح المعدة والاثنى عشري.
❤ ️البواسير.
❤ ️الفتق البوابي.
❤ ️زوائد القولون اللحمية.
❤ ️الاستخدام المزمن للاسبرين والمسكنات الغير ستيرويدية مثل البروفين والفولتارين … الخ، و ادوية الكورتينزون اللي ممكن تسبب فقدان دم خفيف لكن مستمر مع مرور الوقت ممكن يؤدي الى فقر الدم ، او في بعض الحالات الى نزف حاد.
❤ ️النزف الناتج عن سرطانات المرئ او المعدة او القولون.
❤️ النزف الناتج عن دوالي المرئ خاصة في حالات تشمع الكبد
4️⃣ او انه جسمج يحتاج كمية حديد اكبر من الحالات الاعتيادية:
مثلا وقت الرضاعة الطبيعية والحمل.
❓ اتمنى اكون توفقت بتبسيط الموضوع، بسطتها لو عقدتها ؟؟
⏮️ الموضوع الجاي راح اكتب الكم عن الاشخاص اللي معرضين لفقر دم نقص الحديد اكثر من غيرهم.
د. سوران حسن زنكنة
طبيب اختصاصي باطنية ( الأمراض القلبية و الصدرية والجهاز الهضمي والغدد )
الدكتور سوران حسن زنگنه
Instagram.com/DrSoranHassanZangana2
https://vm.tiktok.com/ZSJLnpnk9/
#DrSoranHassanZangana
#د_سوران_فقر_الدم_الناجم_عن_نقص_الحديد
from د. سيف سمير البياتي