ماكل باقلاء
وصاير عنده تكسر
ظاهره عليه الاعراض من شحوب و اصفرار العينين و تحول الادرار الى لون داكن لكن الاهل ما مهتمين بالموضوع
مستمر التكسر لحد ما داخل بصدمة وعائية
والي علاماتها تسارع شديد بدقات القلب و تسارع بالنفس و ضعف ونحول شديد ( حالة يدخل بيها الجسم لمن يحاول يحافظ على حياة الشخص بحيث الدم يتوجه اغلبه للدماغ والرئة والاعضاء المهمة)
مو هنا المصيبة
المصيبة انه نهاية الصدمة الوعائية تباطؤ بدقات القلب ثم تدريجيا يتوجه نحو الوفاة
وصل للطوارئ بآخر لحظة! يعني لمن بدأ قلبه يدخل ب التباطؤ
الحمدلله بجهود المقيمين الدوريين والاخصائي انقذوه و تم إجراء اللازم و الحمدلله اليوم طلع للبيت بصحة جيدة
وهنا نرجع ونوعي على داء الباقلاء لان يومية ٢-٣ مرضى نستقبل بالمستشفى
داء_الباقلاء
داء الباقلاء مرض وراثي سببه نقص انزيم اسمه g6p
و يصيب الذكور بنسبة أكثر من الإناث
اعراضه
تعب و نحول مفاجيء
لون الادرار يصير احمر يشبه الچاي نتيجة تكسر كريات الدم الحمراء بسرعة كبيرة
و ممكن تظهر عند المريض أعراض ابو صفار
هالشيء غالبا يصير بعد تناول الباقلاء او ادوية معينة او أطعمة اخرى
حتى تعرف طفلك بيه هذا المرض تكدر تسويله تحليل بأي مختبر بس تكوللهم تحليل داء الباقلاء
او
G6PD ASSAY
وللعلم المصاب بيه ما يشفى منه لانه نقص الانزيم راح يبقى طول العمر
زين اذا هو انزيم نقص، ليش من يأكل بإقلاء أو نبك أو يشتم حنه يصير عنده تكسر بالدم؟
السبب انه هذه الاغذيه بيها عوامل مؤكسده
هذه العوامل راح تأكسد خلايا الدم و بسبب النقص بهذا الانزيم خلايا الدم راح تتكسر و بالنتيجة يصير عدنا فقر دم و لون الادرار يصير مثل البيبسي أو احمر
السبب بهذا اللون هو العدد الهائل من كريات الدم المتكسرة الي راح تعبر حاجز الكليه و تنزل بالإدرار
اذا طفلك العام اكل باقلاء ومصار بيه شيء
وهالسنة اكلها وصار عنده تكسر فسبب هالشيء انه اكو
بحدود 300 فصيلة من أنواع الباقلاء
ممكن الفصيلة الي اكلها العام ما سوتله بس الي اكلها هالسنة سببتله تكسر
اكو امهات يكولن معناها ما ننطي أطفالنا باقلاء لحد عمر ٦ سنين حتى نحميه
والحقيقة انه داء الباقلاء مرض وراثي ماله علاقة بالأعمار ممكن يصير عنده تكسر بعمر 6 سنين
فإذا
خايفة من المرض سوي تحليل لأبنك حتى تتاكدين
واكو يسألون بعمر سنتين صار عنده تكسر وهسة عمره ١٢ سنة يصير ننطيه؟ والجواب ايضا لا لانه هذا الانزيم حيبقى ناقص طول العمر
اكو ناس صار عدهم تكسر بطفولتهم وهسة ياكلون باقلاء بصورة اعتيادية
تفسير هالشي انه اذا فعلا كان عنده هالانزيم نقص فالباقلاء الي دياكلها مو من الفصيل الي يسببله تكسر او انه التكسر طفيف جدا لدرجة يمر دون ملاحظة احد خصوصا انه كمية الدم عند البالغين اكثر بهواية من كميته عند الأطفال
وللعلم هواية بالغين يدخلون للمستشفى نتيجة داء الباقلاء وتكسر دمهم
والسؤال الي يطرح نفسه
ننطي الطفل باقلاء لو لا؟ يفضل انه تسوون تحليل حتى تتاكدون قبل لا تنطوه خصوصا اذا عدكم احد من خواله او خالاته مصاب بهذا المرض
واذا ماعدكم احد بالعائلة او بخواله وعمامه عنده داء الباقلاء وصار بطفلكم فهالشي تفسيره طفرة وراثية
المرض مو بسيط
ممكن يوصل لدرجات مميتة اذا قلت نسبة الدم هواية
اكو هواية أمهات يكولن ما ننطي باقلاء للطفل وخلص
هالشيء ميصير لانه ممعقولة تحرموه من اكلة غنية بالبروتين لخاطر تحموه من مرض يجوز هو ما مصاب بيه
ولعلمكم الباقلاء الخضرة واليابسة نفس الشي بالنسبة للتكسر لكن حسب نوع الفصيلة
وممكن ايضا حتى ريحة الباقلاء تسبب تكسر
—
حساب التوعية على الانستاغرام
https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال