ماكو شي بالدنيا ما بيه أعراض جانبية
حتى المي خطر بأول ٤ اشهر لان ممكن يخفف و يقلل الصوديوم و بالتالي تصير شمره نتيجه نقص الصوديوم
بس خلي نحجي على الادويه الأكثر رواجا و الأعراض الجانبية الأكثر و الطرق اللي تخلي العلاج اقل أعراضا جانبية
🍁الفلاجيل يسوي فقدان شهيه و يسوي طعم مر بالفم و يسوي اسهال
اي و الله يسوي اسهال
⚘الباريستول اللي هو خافض الحراره اهم عرض جانبي بيه انه يرفع انزيمات الكبد فاللي عنده التهاب كبد فايروسي خلي يتجنبه
ممكن يسوي قيء او غثيان
🍁الفنتولين او البيوتادين يسوي عصبيه و خفقان و حتى سعال يسوي !!!
ممكن تقليله باخذه عن طريق البخاخ
🌷البروفين و البونستان و الفولتارين ممنوعة و بشده على مريض القرحة لان ممكن تخدش بطانة المعده و تسوي قيء دموي و اكيد من اعراضها الجانبية هي حرقة المعده
💖قطرات الغازات اللي بيها simithicone يمكن هي الوحيده اللي من تدور على أعراضها الجانبيه تلكيها قليله
🌺كل المضادات الحيوية( شرابات الاتهابات) ممكن انه تسوي قيء او اسهال او غثيان او غيرها من الأعراض الجانبية
لذلك نكول كل الأدوية بيها أعراض جانبية
بس تفرق هذه الأعراض بين شخص و آخر و جرعة و أخرى و ممكن تظهر و ممكن لا
لذلك خلينا معا نقنن استخدام الادوية الغير ضروريه و نخلي العلاج للحالات الضروريه
هذا البوست لا يعني أبدا عدم تناول العلاج مثل ما وصفه طبيبك
بس يعني لا تنصح باستخدام أدوية للاخر ممكن يروح بيها
د. سيف سمير البياتي
اخصائي طب الأطفال
