هل ذهاب الطفل اللي عنده حراره او سعال للروضة او الحضانه او المدرسه حلال ام حرام ؟
قد يبدو العنوان ديني و اكيد ما راح اجاوب بالدين
بس انتوا دا تشوفون الفايروسات التنفسيه شاده حيلها علينا و اللي أعراضها هي سعال و حراره و التهابات قصبات و اللي من دخل الشتا للان دا يتعب الاطفال
الفايروس ينتشر بين اطفال المدارس عاده و اطفال الحضانات و الروضات
فيا امهاتنا لا تدزون الاطفال للمدارس و الروضات و الحضانات اذا اطفالكم مرضى
اي يم ابنك مرض عادي بس يم غير احد مرض متعب و بالأخص العوائل اللي عدها طفل اقل من عمر ٣ أشهر
❤امهاتنا العزيزات من يتمرض طفلك اللي بالمدرسه اعزليه بغرفه منفصله او بالصالة بالأخص اذا عندك طفل رضيع
❤ شوكت ارجع طفلي للدوام ؟
بعد اختفاء الحراره ب ٢٤ ساعه
يعني اليوم اختفت الحراره
باجر هم اجازه
عكبه ارجع ادزه
الا اذا اكو سعال شديد فاستمر بابعاده عن المدرسه او الروضه اسبوع كامل
❤ جهاز البخاخ او النبيولايزر هلكد ما وصيتكم بيه صار جزء من جهاز البيت فإذا ما مشتري اشتري واحد و أسعاره لا باس بها اذا قارنته بفائدته العظيمه
❤ وين أودي الاطفال و اني عندي دوام و الرجال عنده دوام ؟
هذا يعتمد على ظروفك و ظروف عملك
شويه تنازل منا
شويه تعاون منا
تمشي الأمور
ما اريد اقصلكم قصه حياتي كيف دبرت اموري اني و زوجتي من الاطفال يتمرضون
و شون قسمنا وقتنا و رتبنا وضعنا
❤ كمامه للطفل المريض بالبيت مو رفاهيه بالأخص اذا عندك طفل صغير
❤ تهويه البيت و التعرض للشمس و الاكل الصحي و العسل و الإبتعاد عن المدخنين مو رفاهية هي أساس لكل بيت صحي
❤ لا تجيب طفل ثاني اذا ما عزلت الطفل الأول بغرفه منفصله
احساس الامومه او الابوه تحسه بطفل واحد هو نفسه من انت اب او ام لعشره بس الرعايه اللي تقدمها لعشره اقل بكثير من اللي تقدمها لواحد او اثنين
❤ قللوا الفراوي و الصوف و الاقمشه اللي بيها وبر و قللوا المساحه المفروشه بالأخص اذا عدكم تحسس
❤ عيوني الخطار و اللي تحبون تواصلون الناس و الله التواصل حلو بس نأجلها شويه من اطفالك يتحسنون و الله ابرك و احسن
الشتاء هذا لطيف بجوه بس قاسي بامراضه
الله يحفظكم و اطفالكم
د. سيف سمير البياتي اخصائي طب الاطفال
from د. سيف سمير البياتي