هو صدك الموبايل و التلفزيون و الايباد و ربعهم ياثرون على عين الطفل؟
بصراحه اي !
👀 صدك تحجي دكتور شو ما انعمينا ! هاي مو احنا من كننا صغار لحد هسه ع التلفون و ما صار شي!
😥 اسمعي هذه المعلومه اللي تكولك ان قصر البصر تضاعف بامريكا من سنه ١٩٧١ و بآسيا تخيلي ان ٩٠% من المراهقين بيهم قصر نظر.
اي نعم الاجهزة الذكية احد مسببات زيادة قصر النظر.
🤕 زين ابنك/ بنتك اللي لازم الموبايل ميصار عندة حرقة بعينة! بدة يفرك بيهة هواية! راسة مكام يوجعة!
اي دكتور دائما هو هيج!!!
👌هذا يسموه أجهاد العين الرقمي! اي الة تسمية
هاي شنو واني عبالي شئ طبيعي!
😴 جهالك هم نومهم زين لو هم يسهرون لل٢ و٣ تالي الليل!! لا دكتور ويانة عادي سهرانين وميجيهم نوم خطية!
هذا هم جزء منة صوج الايباد وجماعتة لان شبكية العين كل ما تشوف ضوء عبالهة نهار وتنشط الدماغ!!! اي تخليه ميفرز ميلاتونين اللي هو هرمون النوم.
📴 هسة شلون دكتور يعني الا نمنع الموبايل؟! زين والدراسة الالكترونية مو موجودة!
لا مو شرط ينمنع تماما بس اكو كم شغلة تخليه ميمر بذني السوالف الفوك ☝️
اكو أربع خطوات، نختصرهة بكلمة “ارمش” .
😉 ا – الرمش: ذكريه كل شوية يرمش.
يعني بس اكلة ارمش ,لا سوي منبه على موبايلك كل ٢٠ دقيقة، وكليلة باوع علية (يفضل انت تكونين على بعد ٢٠ قدم يعني ٦متر) وخليه يباوع لمدة ٢٠ ثانية.
وتفيد! اي هاي حسب دراسات مثبتة ونسميهة قانون ٢٠-٢٠-٢٠.
💧 ر – رطب العين : اذا مفاد فممكن نجي نستخدم قطرات مرطبة احنة الاطباء نوصفهة اذا شفناه الطفل يحتاج.
🤳 م – مسافة امنة: شنو يعني! يعني لا يلزك بالجهاز، خليه يلزمة بعيد شوية بمسافة طول اليد. اي رح يخلي العين متجهد نفسها. وها قليلي السطوع الجهاز.
💪 ش – شجع الأطفال: نشجعهم يعوفون الموبايل والايباد وياخذون فترة راحة! دكتور ميقبل يعوفة! زين شلون؟
الكيلة شغلة، صخريه، دزيه، انطيه غير سالفة، مثلا يلعب طوبة او تلعب باللعابة.
وحسب إرشادات منظمة الصحة العالمية اللي تكول أي جهاز ذكي ممنوع قبل عمر السنة، ساعة باليوم لعمر سنتين الى اربع سنوات, بعدها ممكن ساعتين باليوم.
😎 دكتور كللولنة نسويلهة مناظر مال موبايل بيهة فلتر! تفيدهم؟
لا ميحتاجون, اي اني اكلك ميحتاجون وهاي شغلة غلط وتجارية الا اذا جان عدهم مشكلة بالبصر.
د. صهيب علي جواد
أخصائي طب وجراحة العيون
https://www.facebook.com/dr.sohaib.vision/
from د. سيف سمير البياتي