💚و بازدياد حالات الكورونا بالعراق و انتشاره الوبائي
اكيد راح تبدي حالات الكورونا تزداد عند الاطفال
كنسبه و تناسب مجتمعي
لحد الان
كورونا خفيف على الاطفال و اقل تاثير و اقل نسب وفيات
اقل !
اي نعم اقل و راح اكتب عن نسب الوفيات بنهايه البوست
❤اعراض الكورونا متنوعه جدا
بس بصوره عامه هي اخف عند الاطفال من الكبار
حسب مركز السيطره على الامراض الامريكي https://europepmc.org/article/MED/32271728
الاعراض هي:
حراره
و سعال
و فقدان الشم
اسهال
قيء
طفح جلدي
تعب
و تستمر الاعراض عدا الحراره اسبوعين
بدراسه مهمه من مجله pediatric
لكوا انه ٩٠% من الاطفال اعراضهم خفيفه جدا
رابط المقال:
https://pediatrics.aappublications.org/content/pediatrics/early/2020/03/16/peds.2020-0702.full.pdf
💙شنو تسوي اذا طلع او شكيت انه الطفل عنده اعراض ؟
اعزل الطفل
و لا تنسى كمامه للطفل مهمه جدا دام عمره اكبر من سنتين من نراجع المستشفى
❤شوكت نراجع المستشفى ؟
1. اذا الطفل يبدو متعب منهك
2. اذا عمر الطفل اقل من ٣ اشهر و عنده حراره اكثر من ٣٨
3. اذا عمره بين ٣ الى ٦ اشهر و حرارته اكثر من ٣٩
4. اذا طلع عنده طفح و حراره
5. اذا استمرت الحراره اكثر من ٥ ايام
6. اذا بدت علامات جفاف مثل قله الادرار
7. الطفل عنده حراره ما تنزل بخافض الحراره
8. ضيق التنفس
9. فقدان وعي
10. ازرقاق الشفه
طبعا اكيد وياها تلامس مع حاله كانت عدها كورونا
المصدر :
https://www.nhs.uk/conditions/coronavirus-covid-19/symptoms/coronavirus-in-children/
💚العلاج
ناكد على موضوع العزل المنزلي لمده 7 يوم من اول ايام الاعراض
و اذا الطفل ما عنده اعراض قويه نكعد بالبيت
و نبدي ننطي الكثير من السوائل
و خوافض الحراره
و بس
اذا الطفل يعاني من وحده من النقاط المذكوره العشرة اكيد دخول مستشفى علمود الاوكسجين و علاجات اخرى
كورونا فايروس ماله علاج لحد الان
💙نجي شويه نتفائل و نكول انه الاطفال اقل عرضه للاصابه بكورونا مو بس اقل اعراض
مثلا بدراسه نشروها مركز السيطره على الامراض الامريكي لكوا انه من اصل ١٥٠ الف مصاب بكورونا
اكو فقط ٢٥٠٠ مصاب طفل !!
و بدراسه كوريه فقط ١% من المرضى كان عمرهم اقل من سنه !
https://europepmc.org/article/MED/32257774
💛نجي شويه نخاف ؟
على منو نخاف اكثر ؟
على الاطفال اللي عمرهم اقل من سنه
يكونون اكثر عرضه لدخول المستشفى و للمضاعفات
❤هل اكو وفيات بكورونا من الاطفال؟
طبعا اكو
بس النسبه بالكبار ٢ الى ٣ %
بس للاطفال حسب دراسه اوربيه هي اقل من ١ %
بحيث من اصل 582 طفل توفى ٤ اطفال فقط
٢ منهم عدهم امراض مزمنه
و كلهم اكبر من عمر ١٠ سنوات
رابط الخبر على البي بي سي
https://www.bbc.com/news/health-53181525
💜هل نطمئن جدا؟
مع زياده عدد الاصابات ممكن تزداد نسبه اصابات الاطفال
💚و الحل؟
الوقايه خير من العلاج
اللقاح للكبار و لما يرخص للاطفال على الشتاء القادم
التباعد الاجتماعي
و الكمامات
💙 ليش كتبت عن هذا الموضوع ؟
لان اشاعه ان الاطفال ما يصابون لازم تنتهي
د. سيف سمير البياتي
اخصائي طب الاطفال
from د. سيف سمير البياتي