هل تعرق الطفل خلال النوم طبيعي ؟
الجواب و بكلمه واحده نعم
طبعا هذا على فرض ان الطفل طبيعي و ما عنده حمى و نموه طبيعي
السبب اللي يخلي الطفل يتعرق أكثر من المعتاد هي التالي :
١. ما يتحرك الأطفال هوايه أثناء النوم مثل الكبار فاللي يصير انه كلنا شايفيه من نبقى على وضعيه وحده الجسم تصعد حرارته و بالتالي يتعرق أكثر و أكثر لان مكانه ثابت
٢. الغدد العرقيه للطفل اقرب لسطح الجلد من الكبار
و الغدد العرقيه بالراس أكثر من الكبار
٣. ارتفاع درجه حراره الغرفه
و هاي للمره المليون احب اذكركم انه احنا عايشين بالعراق مو بالاسكيمو و الله
العراق اللي درجه حرارته ٥٠ بالصيف
.
.
و الحل شنو؟
اولا حراره غرفه معتدله بين ٢٠ إلى ٢٢ إذا عندك محرار غرفه
ثانيا ملابس خفيفه و عريضه للنوم
ثالثا عدم المبالغه بالتغطيه
.
.
هل يشمل هذا التعرق أثناء الرضاعه؟
انت شايفه من تحمليه شون؟
نفس التفسير بأول نقطه لان الطفل يبقى ثابت بحضنك و بالتالي راح يتعرق لان مكانه ثابت
.
.
اكيد سمعتوا عن أن كثره التعرق ممكن تكون بسبب نقص فيتامين دي
فهل هذا صحيح؟
اي نعم صحيح ممكن يكون سبب لكثره التعرق
بس اذا انت تنطين فيتامين دي لطفلك من اول ايام بعد الولاده
موجود بوست مفصل عن فيتامين دي
فخلص اطمئني
و ارجعي للاسباب الاولى ببدايه البوست
اكو أسباب أخرى للتعرق؟
ممكن المرض التسنين الحراره الادويه و حتى البخاخ
بس يبقى السبب الأول عراقيا هو المبالغه بالتدفئه
د. سيف سمير البياتي
اخصائي طب الأطفال
#نوم
#نوم_الرضيع
#تعرق
from د. سيف سمير البياتي