اليوم الموضوع عن سكري الأطفال و بصيغة الاسئله و الاجوبه
اكيد ما راح اغطي كل النقاط
بس راح اختار أكثرها اهميه .
.
😁السلام عليكم دكتور ممكن شوية تحجيلي عن سكر الأطفال شنو سببه؟
أول معلومه احب اوصلها انه أغلب الأطفال المصابين بالسكري الأطفال هو السكري من النوع الأول اللي هو ناتج من مهاجمه النظام المناعي لخلايا البنكرياس و بالتالي يقل الانسولين
😢دكتور شنو كلت نوع اول! ليش اكو نوع ثاني؟
اي نعم اكو نوع ثاني هذا النوع بالاغلب يصيب الكبار أو فوك ال 30 سنه و اللي يكون عدهم سمنه في أغلب الأحيان و هذا النوع البنكرياس يشتغل طبيعي يعني سكر الأطفال يختلف عن سكر الكبار
😧 ها دكتور خوش حجي وضحت الفكره بس شنو علاج سكري الاطفال؟
ببساطه اقري التعريف
التعريف يكول هو السكري الناتج عن نقص الانسولين إذن علاجه الوحيد الانسولين فقط فقط فقط
😯 دكتور ما يتعود عليه ؟ يعني ما يتعود ع الانسولين؟
ادري امي قابل هو حبوب كبسله هو عنده نقص بالانسولين و لازم يعوض هالنقص
😢زين دكتور ممكن يأخذ حب؟
الحب بيه أنواع هوايه و مع كل الاسف كلها ما توالم طفلك و ممكن تضره و قد تؤدي إلى الوفاة
طيب دكتور شنو أعراض السكر ؟
سهله هاي يشرب مي هوايه و يتدرر هوايه و يأكل هوايه
😴 سهل تشخيصه؟
اي جدا سهل اذا اكو أعراض مثل اللي كلتهن فوك و سكره 200 هو هذا سكر
😳زين رحت لطبيب و الطبيب كال خلي كلشي يأكل بس اني كلت اسالك صدك دكتور كلشي ياكل؟
هو بالمطلق اي فعلا كلشي يأكل بس بدون شكر أو أي ماده صناعيه بيها شكر
يعني مو مريض سكر و يشربله بطل بيبسي مثلا
😢زين دكتور فصلي الاكل؟
شوفي امي بالنسبة للخضروات
و الفراوله براحته كلش
و الأجبان و الألبان و البيض هم براحته بس اكيد مو بكميات كبيره جدا
😣 كمل دكتور زين و الخبز؟
الخبز اذا ما عنده داء الحنطه احنا نفضل الأسمر أبو النخاله
😡يعني مو الا بالشعير؟
لا مو الا شعير بس الأهم بيه نخاله حتى يبقى أطول فتره ممكنه بالأمعاء و يفضل تجنب الخبز أو الصمون اللي بيه شكر و حليب و نقلل كلش من الصمون الفرنسي
😳 زين و الفواكه؟
الفاكهة نوعين نوع عالي السكريات مثل التمر و التين و العنب و الموز فخلي يأكل تمرتين مثلا أو نص موزة
باقي الفواكه زينه باعتدال يعني تفاحة باليوم و برتقالة باليوم
و احذري من كلشي مجفف و ملعب
يعني المشمش المجفف و الزبيب و الكشمش
😯 ليش دكتور؟
لأن من يتجفف يصير بيه سكر أعلى بأربع مرات
😁 زين بالنسبه للكرزات؟
اعتدال كلشي بالاعتدال
😊طيب اكدر استخدم السكرين أو المحلي؟
اي ممكن بس لا هوايه باليوم مرتين
😆زين يصير اسويله عصير ؟
هسه اني اسالك حتى تسوين عصير كم برتقالة يرادلك؟
😃 3 برتقالات
زين هو يأكل برتقالة احسن لو يشرب عصير 3 برتقالات؟
😄لا دكتور اكيد بس برتقالة
😁زين دكتور شيشرب
امي تكدرين تشربيه لبن و البرتقال تخففيه اذا مضطرة بس ارجع و اكول ياكلها احسن
😁 دكتور تفيده الأعشاب بيت جيراننا عطارين و كالوا جيبي و هسه ينزل سكره ؟
لا ما تفيده و الله تضره و العظيم تضره و اني شايف اطفال توفوا بسبب الأعشاب فأخذي حذرك منهن
😦 دكتور من يكبر يتحول إلى حبوب ؟
لا ما يتحول
😃زين دكتور يصير يلعب لو الحركه مو زينه عليه ؟
كلما يلعب أكثر احسن
أحسن شي الحركه و الرياضة و المشي اله
😐دكتور عادي يروح مدرسه؟
طبعا ابنك طبيعي و كلشي ما بيه
😯 دكتور ابني زين و أموره زينه و تحاليله زينه
كل شكد اشوفك ؟
كل 3 اشهر لازم ينشاف مره
😃 اكو ملاحظه أخرى دكتور؟
اي خلي يشرب مي هوايه كلش هوايه
ملاحظه : موضوع السكر كبير جدا و بيه آراء متعدده قد يختلف الرأي من طبيب لآخر بس المهم لا تؤذي طفلك برفض الانسولين و الاعتماد على الأعشاب القاتلة
باقي الاسئله يفضل الاستفسار المباشر من طبيبك
اذا عجبك المنشور شاركه
و إذا كلش عجبتك المعلومه فشوف باقي بوستات الصفحه سويلها لايك
مشاركتك ممكن تغير حياه طفل ابوه أو أمه ما فاهمين الموضوع
د. سيف سمير البياتي
اخصائي طب الأطفال
و لا تنسون موعدنا بيوم ٢٥ بهذا الشهر بس قبلها اتصلوا على رقم العياده و ثبتوا الحجز لحضور اول تجمع لاطفال السكري
