جرعه الباريستول
شويه نحتاج تركيز و اقروها مقطع مقطع
الشراب يجي بصيغتين
١٢٠ ملغرام و ٢٥٠ ملغرام
.
.
نجي على ابو ١٢٠ ملغرام
هذا نص الوزن ٤ مرات باليوم
يعني وزنه ١٠ كيلو ننطي الطفل ٥ سيسي ٤ مرات باليوم
وزنه ٨ كيلو ننطي ٤ سيسي ٤ مرات باليوم
شويه نصعبها عليكم
اذا نريد ننطي كل ٤ ساعات ننقص سيسي من المعادله
يعني
وزنه ١٠ كيلو ننطي ٤ سيسي كل ٤ ساعات
وزنه ٨ كيلوات ننطي ٣ سيسي كل ٤ ساعات و هكذا
.
.
.
أما شراب ابو ال ٢٥٠ ملغرام فحسابه مبين صح؟
اي نعم
ربع الوزن ٤ مرات باليوم
يعني وزنه ٢٠ ننطي ٥ سيسي ٤ مرات باليوم
وزنه ٤٠ كيلو ننطي ١٠ سيسي ٤ مرات باليوم
بس يبقى شراب ٢٥٠ ملغرام افضل للاعمار فوق ٦ سنين بس عادي يكدر طبيبك يحسب الجرعه
.
.
.
آخر شي القطرات و اشهرها و اسهلها الادول قطره
هذه سهله جدا تاشيره لكل كيلو
يعني شايفيها شون مدرجه اعشار
صفر فاصله ٢ . صفر فاصله ٤ . صفر فاصله ٦ . صفر فاصله ٨ و اخيرا ١ سيسي
مثال
وزنه ٨ ننطي 0.8 نكدر كل ٤ ساعات او ٦ ساعات
وزنه ٦ ننطي 0.6 نكدر كل ٤ ساعات او ٦ ساعات
وزنه ١٠ ننطي 1.0 كامل كل ٤ ساعات او ٦ ساعات
و هذا شاي بالصوره على ضفاف البسفور حتى نصحصح و نقرا البوست
لطفا لا تغلطون بالجرعه
و استخدموا اقل جرعه ممكنه
و لا لا لا و مليون لا للشراب و التحميله سويه و إنما افصلوا بينهن اقل شي ٤ ساعات و افضل شي ٦ ساعات
و الله يخليكم و يسعدكم و يهنيكم عوفوا الفولتارين و البروفين للوصفه الطبيه لان كاعد تصرفوه خطا بالجرعه الخطأ للمرض الخطأ
د. سيف سمير البياتي
اخصائي طب الأطفال
