شربتوا شاي؟
اذا شربتوا جاي تعالوا ادوخكم شويه
بداء الباقلاء
و ليش يكون بالذكور اكثر
و ليش من يصير بابن اختك داء الباقلاء لازم تجيكين ابنك عنده داء الباقلاء لو لا ؟
بكل خليه بجسمنا اكو ٤٦ كروموسوم
اثنين من هذه الكروموسومات
هي الكروموسومات اللي تحدد كوننا ذكور او اناث
الذكر يكون XY
و الانثى XX
طيب
افرض واحد من ال X كروموسوم بيه جين داء الباقلاء
خلي نخلي يمه اشاره X” هذا الكروموسوم بيه هذا الجين
لهذا الانثى اللي عدها جين واحد تكون X”X و بما انه الكروموسوم الاخر ما بيه شي اذن هذا الكروموسوم يحميها و ما يخليها مصابه
اذن يسموها حامل للمرض
هذا يعني انه تنقله لابنها الذكر
ليش ؟
لان الذكر عنده بس كروموسوم X واحد
اذا كان هذا الكروموسوم X”
فيصير اذن مصاب بالمرض لان ماعنده كروموسوم X يحميه
لهذا مختصر الكلام من يصير بعائله الام داء الباقلاء لازم نجيك اولادها
اكيد راح اقرا تعليق بس دكتور اكو بنات بيهن داء الباقلاء !!
اي نعم ممكن يصير بالبنات داء الباقلاء
اذا كانن الكوروموسومات الاثنين مصابه
او في حاله اخرى و هي ان يكون الكروموسوم المصاب X” اقوى من المو مصاب فتطلع عند الاناث الاعراض
اعرف الموضوع شويه صعب
و يحتاج الى الرويه
و مسائكم خير
د. سيف سمير البياتي
اخصائي طب الاطفال
