الكورتزون
الدكسون
هايدروكورتزون
بيتاميثازون
بردنزلون
ديبوميدرول
هذه اسماء ادويه
ممكن سامعين بيها او ببعضها و بالاخص الدكسون و الهايدروكورتزون
الادويه هذه هي اسماء مختلفه للكورتزون
الكورتزون هو هرمون يفرز من الغده اللي فوق الكليه
ينظم الالتهابات و رده فعل الجسم
من بعد اختراع المضادات الحيويه
تعتبر ثوره الكورتزونات هي الاعظم بعد المضادات الحيويه
الكورتزونات علاجات سحريه لا تخلو طبعا من الاعراض الجانبيه حالها حال اي علاج او اعشاب او مواد استطباب اخرى
بس اهم شي باستخدامها ان لا تستخدم فترات طويله
ليش ؟
لان من تستخدم لفترات طويله راح يتثبط انتاج الكورتزون الداخلي و نفوت بسلسله مضاعفات نتيجتها خمول بالغده المذكوره انفا
و طبعا كلما الفتره أطول
كلما الاعراض الجانبيه اكثر
و كلما العلاج موضعي
كلما الاعراض الجانبيه اقل
مثل بخاخات الانف و الربو
عدا المراهم الجلديه لان شافوا انه تمتص من البشره بنسبه عاليه و خصوصا عند الاطفال لذلك استخدام المراهم اللي بيها ستيرويد مثل النستاكورت و البتنوسام و الدرمودين لجلد الطفل دون وصفه طبيه و لفتره طويله جريمه
نجي على الفتره شكد تعتبر طويله؟
المصادر مختلفه قسم يكولون اسبوع و قسم يكولون اسبوعين
و احد المصادر يكول ١١ يوم
لذلك خلينا على اقل فتره اللي هي ٥ ايام فقط فقط فقط
الكورتزونات غيرت حياه ناس هوايه للاحسن اذا باشراف طبي
و للاسوا اذا بيد ناس ما تعرف شنو دا تسوي مثل حبوب الدكسن و خلطات الوجه اللي بيها بتنوسام و درمودين و خلطات الحفاظات اللي بيها نستاكورت و درمودين و غيرها من المواد السيئه
الكورتزونات فقط بيد الطبيب و فقط لفتره محدوده
الا لمرض معين فممكن يستمر عليه اسابيع او اشهر او حتى سنوات مثل داء الذئب الاحمراري و التهاب المفاصل الرثوي و غيرها
خليكم بالمنطقه الامينه
و اعتبروا نفسكم عايشين بانكلترا
و غير شراب السعال و خافض الحراره لا تستخدموه دون وصفه طبيه
د. سيف سمير البياتي
اخصائي طب الاطفال
