الأمومة مهمة عظيمة وضريبتها أعظم تحتم عليچ تكونين مثقفة وواعية برعاية أولادچ وتربيتهم..
مثلما تخصصين وقت تشتريلهم أحلى الملابس حتى يطلعون بصورة جميلة أيضا خصصي وقت على كيفية الحفاظ على صحتهم والإهتمام بيها.
الممية حدها للسنة بعد السنة ضروري تفطمين الطفل منها ولتگولين يبچي ومايگدر بلياها ومايقبل!!!
منو المسؤول هو لو انت؟!
منو القائد هو لو انت؟!
هو ديبچي ويريدها لأنه مايعرف مصلحته مايعرف مضارها شنو!
بالتالي هنا يجي دورچ.
وخلي يبچي خلي يخبص الدنيا يوم يومين ينسى.
مخاطر الممية لاتعد ولاتحصى أبسطها تسوس الأسنان نتيجة الممة والي غالبا هذي الأسنان مايفيدها أي حشوة إلا القلع والقلع حيكون بوقت مبكر جدا بالتالي الأسنان الدائمية حتتأخر بالخروج وإذا طلعت فتطلع متراكبة ومو بمكانها الصحيح وبالتالي مستقبلا يحتاج تقويم..
وايضا الإستمرار باستخدام الممية والملهي يؤدي الى مشاكل بالفكين وتسبب فتحة بالاطباق وايضا مستقبلا لازم تقويم..
وغيرها من المشاكل والأمراض نتيجة تلوث مصاصة الممية.
اطفالكم أمانة فأحسنوا رعايتهم وتربيتهم.
.
.
تعليق اكثر من رائع من طبيبه اسنان على احد بوستات الفطام من المميه شفت انه يستحق يكون وحده ببوست
from د. سيف سمير البياتي