التهاب الكبد الفيروسي النوع A
هو التهاب الكبد الوبائي اللي يصير أكثر شي باطفال المدارس و اللي يسكنون بالمخيمات او اللي ياكلون اكل من بره ملوث بهذا الفايروس
😋شون ينتقل هذا الفايروس ؟
ينتقل عن طريق الاكل و الشراب الملوث بخروج الشخص المصاب بهذا الفايروس
😎 شكد فتره حضانته الفايروس؟
فتره الحضانه هي الفتره بين اخذ الفايروس و ظهور الاعراض و هاي الفتره بين ٣ إلى ٤ اسابيع
يعني من يصير بطفلك التهاب الكبد الفيروسي راجعي الأحداث منين اجه لطفلك الفايروس بيت اقارب مثلا او طعام من مصدر غير موثوق
🙂 شوكت يعدي؟
هذا دائما خطا يصير بيه
الفايروس يعدي اسبوعين قبل ظهور ابو صفار و يبقى يعدي بحوالي اسبوع إلى ١٠ ايام بعد ظهور ابو صفار
لهذا تشوفون هذا الفيروس منتشر لان يعدي حتى قبل ظهور الاعراض
😣شنو أعراضه؟
_تعب و ارهاق و فقدان شهيه و أعراض عينن انفلونزا و ممكن قيء و بعدين يظهر اليرقان و يصير لون الادرار طوخ
🤗 شنو العلاج و اله علاج معين ؟
_لا ماله علاج معين هو ياخذ فترته و يطيب و تطول الاعراض مالته ٤ اسابيع او اقل و هو يختفي شويه شويه
🙄 دائما نسمع بالبهريز و هل هو فعلا ضروري ؟
_لا مو ضروري الاهم من البهريز هو الاكل الصحي المتوازن الغني بالفواكه و الخضروات و شرب السوائل المتعدده يعني مو الا دبس و عسل
اكل طبيعي متوازن كلش كافي فالاهم ياكل الطفل
😏 زين اكو غير أنواع و البقيه تتعالج ؟
_اي نعم اكيد اكو هوايه انواع ال b و c و d و e و تختلف جذريا عن الفايروس اللي دا احجي بيه
و نوع بي هو الوحيد اللي بيه لقاح بالعراق
😐 ممكن يكون خطر على الحياه؟
_بنسبه جدا قليله 1 % فقط ممكن يؤدي إلى الوفاه
😀 شنو طريقه التشخيص؟
_تراجع طبيبك
طبيبك راح يدزك تحاليل الفايروس و لوظائف الكبد و يتأكد انه النوع A
😃 شون يتابعه الطبيب ؟
_اولا عن طريق الفحص مره أسبوعيا و يدزك تحاليل كل اسبوع مره و يشوفك و لمده ٤ اسابيع فقط وراها تتشافى
😣 اله علاقه بابو صفار اللي يصير بعد الولاده ؟
_طبعا هذا السؤال يضحك لان كل ابو صفار و اله ميكانيكيه حدوث
ماله علاقه واحد باللاخ نهائيا
هذا عدوى فايروسيه و ذاك عدم نضوج انزيمات الكبد
🤔ممكن يدخل الطفل للمستشفى؟
مو شرط يدخل للمستشفى بس طبيبك راح يدخلك للمستشفى اعتمادا على الحاله السريريه و التحاليل اللي طلبها منك
🙂 اللقاح مال التهاب الكبد يحمي من التهاب الكبد نوع A ؟
_ لا لان هذا اللقاح ضد التهاب الكبد نوع B مو A
😎 يعني اكيد مو الا دبس و الدبس و العسل ما يطيبه؟
لا مو الا طبعا اهم شي ياكل زين و أحيانا يكتب له الطبيب فيتامينات
🤔طيب دكتور يكولون لازم يتجنب الادويه و بالأخص خوافض الحراره مثل الباريستول ( الادول/ الأنتي بايرول و البندول) ؟
_ صحيح كلش نفضل انه يتجنب الادويه اللي تتعامل بالكبد لان تدرون الكبد يرادله نقاهه و راحه فماكو داعي ابدا تثكلون شغل الكبد و تنطوه علاج معروف عنه انه يتعامل بالكبد
😍شنو طرق الوقايه ؟
النظافه النظافه النظافه و غسل الايدين جيدا و اكل الطعام من مصادر موثوقه بنظافتها
☺ و في حاله ابني صار بيه شون امنع العدوى ؟
كلتلك اصلا هو يعدي قبل ظهور الاعراض بس هذا ما يعني عدم الأهتمام بموضوع العزل و هو انه تنظيف التواليت جيدا بعد الاستخدام و غسل اليد جيدا بعد التواليت
ملعقه خاصه بالشخص المصاب
و قدح كذلك
و منشفه خاصه بيه
😏 آخر سؤال دكتور شنو وظيفه الكبد ؟
الكبد هو المصفي و كلشي تاكله يعبر الكبد و يفلتره و لهذا العلاج اللي راح تأخذه راح يروح مباشره الكبد و ممكن يؤذيه اذا كان العلاج يتعامل بالكبد
شكرا الكم
و تمنياتي الكم بدوام الصحه
و رجاءا المشاركه من الصفحه مباشره
و لا تنسون المشاركه و دعوه اصدقائكم و الاطلاع على باقي بوستات الصفحه
د. سيف سمير البياتي
اخصائي طب الأطفال
