جدري الماء – chickenpox
اجدادنا العظماء سموه (جدري الماء) يجوز قصدهم اليصاب بيه يصير چنه جدر ماي حار ، على اي حال ابو خريان من اشهر الامراض الانتقالية
☺شنو تعريفه ؟
هو مرض فايروسي يسببه (varicella zoster virus (VZV
😣شون ينتقل؟
ينتقل للاشخاص بطريقتين اما بالملامسة المباشرة للشخص المصاب او عن طريق الرذاذ اليطلع لمن الشخص يعطس او يگح بالضبط من السوائل الموجودة بالفم.
😃المن يصيب بالاكثر؟
يصيب الاطفال عادة من عمر يوم إلى عمر ١٠٠ سنه وهو مرض بسيط كم يوم ويروح بس المشكلة اذا صار ب٣ فئات واعراضه بيهم تصير قوية ؛ الكبار و الحوامل والعدهم المناعة موتمام
😚زين ليش نخاف منه بذوله الفئات ؟ ،
باختصار الكبار يزود عدهم نسبه الاصابه بذات الرئه خصوصا بالمدخنين وهذا الالتهاب احيانا يكون قاتل ، الحوامل وخصوصا باول ٣ اشهر الحمل ممكن يسوي تشوهات ولادية بالجنين ، وبالنسبة للمناعتهم ضعيفه فهاي الفئة كلشي يصير بيهم نخاف منه .
😄شنو مراحل المرض و شون يبدي؟
-المرض معروف يبدي بطفح (طگاگ 😑 حب زغار وردي او احمر بداخله سائل او جراحه ومن يتگشر يصير اسود) يطلع بالوجه وقشرة الراس وبالصدر والبطن والظهر و قليل يصير بالاطراف ، الطفح هذا وياه حكة وارتفاع بدرجة حرارة الجسم ومرات صداع والمريض ماله خلگ ، من گد الحكة مرات بمكان خدوش الحكة يصير عنده التهاب بكتيري
-☺زين بيا وكت المريض معدي؟؟
سؤال وجيه ، المريض معدي ب ٢-٤ ايام قبل ظهور الطفح الجلدي الى حد تقشر آخر طگاگة ، ولمن الشخص يلگف الفايروس ما يطلع بيه بسرعة انما يبقى ١١-٢٠ يوم يله تطلع الاعراض اللي هي اسمها فتره الحضانة
☺شون يصير التشخيص؟
-طبعا التشخيص عادة بالفحص ومرات مبينه و معروفه يجون جهال اختك واحد منهم بيه ابو خريان و وره فترة يطلع باطفالكم لو اكو طالب بالمدرسة بيه جدري الماء و بس ابننا لگف الفايروس.
🤗هسه اذا ثبت عيد و ابننا بيه جدري الماء شنسوي ؟؟
اول شي ممنوع اي تلامس جسدي وي المريض و نعزل شغلاته وحده ، الخاولي والخاشوگة وهاي السوالف ، و نقرض اظافره حتى مايأذي نفسه بالحكة و مايلطش الفايروس جوه الاظافر لمن يحك وبالتالي ينتقل لغيره بسهولة ،ويسبحونه يومية ، اذا عنده دوام ياخذ اجازة يطگله ١٤ يوم
😎 زين دكتور ماله علاج ؟
طبعا اله علاج يراجع الطبيب اول ما يطلع الطفح و يكتبله علاج مضاد للفايروس و نوبات يكتبله دوه التهابات اذا عنده علامات التهاب بالجلد
د. سيف سمير البياتي اخصائي طب الاطفال
from د. سيف سمير البياتي