#سعال_رشح
يصاب الطفل عاده بمعدل 6 إلى 8 مرات بالسعال و الرشح سنويا و عادي جدا انه ينصاب إلى حد 12 مره بالسنه
الاعراض تكون خفيفه دائما وهي عبارة عن رشح و سعال و ارتفاع طفيف بدرجة الحراره و شويه انزعاج و نحاسيه
أهم معلومه أريد أوصلها انه مدة النشله تطول من أسبوع إلى اسبوعين و أنه ماكو علاج شافي الها و إنما العلاج فقط للاعراض اللي تسويها
لأن هي النشله وحدها تطيب و تأخذ فترتها اللي هي أسبوع إلى اسبوعين و تروح
العلاجات هوايه و موجوده و فعاله لتخفيف الاعراض تكدرين تسالين بيها طبيبك
بس اكو أشياء تخفف من النشله تكدر تسويها بالبيت الك و لطفلك
أهمها هي اشرب مي هوايه فا اشرب مي هوايه
و النصائح هي
1. اشرب مي هوايه
2. تكدر تستنشق بخار المي من مصدر للبخار
3. دائما نظف انفك بالمناديل الورقيه
4. تكدر تستخدم قطرات المي و ملح أو نورمال سلاين
5. حاول تبقى مرتاح و دافيء
6. تمضمض بمي دافي و ملح
7. اشرب سوائل ساخنه و إذا عمرك فوك السنه تكدر تضيف العسل للسعال
8. استخدم حبوب المص الي بيها نعناع
9. استخدم مخده زايدة
10. كمادات دافيه اذا كان عندك وجع بوجهك
و لا تنسون منشن لكل اللي يكولون احنا أطفالنا ينشلون هوايه خلي يشوفون المعدل الطبيعي
١٢ مره بالسنه اي نعم
١٢ مره بالسنه
لاحظتوا ال ١٠ نقاط؟ ماكو شي اسمه مضاد حيوي للنشله
النشله هي تطيب
د. سيف سمير البياتي
اخصائي طب الأطفال
