10 شغلات تخلي ضغطك عالي وما ينزل.
من الأسئلة اللي دايم ننسالها، دكتور اني اخذ دواء الضغط بس ضغطي بعده صاعد ليش؟؟؟
اليوم راح نجاوبكم و نقول لكم 10 اسباب تخلي ضغطك صاعد و ما ينزل:
1️⃣. اذا اكلك مو صحي يعني بيه ملح هواية او دهين، او كمية البوتاسيوم بيه قليلة ( البوتاسيوم موجود بهواية خضروات و فواكه مثل: الطماطة، الافوكادو، الموز، البرتقال، البطيخ، الرمان، التمر، السبيناغ، البروكولي… واشياء اخرى هم)
2️⃣ اذا اسلوب حياتك خامل يعني بيه قعدة هواية و حركة قليلة، و ما تسوي رياضة.
3️⃣ اذا تدخن جگاير او نرگيلة.
4️⃣. اذا تشرب مشروبات كحولية هواية.
5️⃣ اذا مدتاخذ ادويتك بشكل مضبوط مثل ما كاتبه الك الطبيب، مثلا ما تاخذه بوقته، او تاخذه بين يوم، او عند الحاجة، واللي كلهن غلط.
6️⃣ اذا عندك قلق او حالتك النفسية مو تمام.
7️⃣ اذا عندك آلام مزمنة، لان وجود الم باي مكان بالجسم ممكن يرفع الضغط.
8️⃣ اذا دتاخذ ادوية ترفع الضغط، مثل بعض المسكنات، مضادات الاحتقان، ادوية النشلة، الكورتيزونات، بعض ادوية منع الحمل… وادوية اخرى هم.
9️⃣ اذا ارتفاع الضغط عندك هو ارتفاع الضغط الثانوي الي سببه مرض او حالة اخرى، بهاي الحالة المرض او الحالة المسببة لارتفاع الضغط لازم يتعالج.
1️⃣0️⃣ او ممكن تكون ولا سبب من الاسباب الفوق، لكن دواءك او ادويتك تحتاج زيادة في قوتها او كم مرة تاخذها باليوم او تحتاج اضافة ادوية اخرى او تبديلها، و هالشي لازم يكون تحت اشراف طبيبك المعالج وما لازم تسوي من روحك.
مريضكم اللي عنده ضغط، مسيطر عليه ؟؟
اذا شفتوا البوست مفيد، سووا اعجاب و تعليق و مشاركة حتى توصلكم البوستات الجاية ويوصل المنشور لاكبر عدد من الناس ويستفادون.
د. سوران حسن زنكنة
طبيب اختصاصي باطنية ( الأمراض القلبية و الصدرية والجهاز الهضمي والغدد )
بكالوريوس طب و جراحة عامة
بورد (دكتوراه) في الطب الباطني
عضو الكلية الأمريكية للأطباء
Facebook.com/DrSoranHassanZangana2
Instagram.com/DrSoranHassanZangana2
https://vm.tiktok.com/ZSJLnpnk9/
#DrSoranHassanZangana
from د. سيف سمير البياتي