العين الكسولة
🔳 شنو تعني؟ ببساطة احد العيون متكدر تشوف بوضوح (متوصل ل٦/٦) بينما الثانية تكدر، “هذا المصطلح ضروري يشمل البصر مع النظارات”.
🔳 شوكت تصير؟ بفترة النمو البصري، من الولادة لحد عمر ٨-١٠ سنوات، فنحتاج بهاي الفترة نظر ١٠٠%، عداها رح يصير ضمور بالخلايا الموصلة بين الدماغ وتلك العين.
📈 تدرون اذا كلتلكم انه كل طفل من اصل ٥٠ طفل ببريطانيا عندة هاي المشكلة! و ٢-٤% باميركا وتعتبر السبب الرئيسي لضعف البصر بالاطفال وتقدر ب١٢ مليون طفل.
🔳 منو من الاطفال معرض اكثر؟ اللي عدهم تاريخ مرضي بالعائلة للعين الكسولة، حول، اخطاء انكسارية، مشاكل خلقية بالعين مثل ماء ابيض او هطول جفن.
🔳 منين جتي التسمية؟ تعرف كل الناس ايدها لو يمناوية او يسراوية، اني طبعا استخدم ايدي اليمين لان ببساطة من أني صغير تعلمت أستخدمها فالدماغ انربط بيهة بقوة وفظلهة على اليسار مع العلم اليسار مابيهة شئ، نفس الشى ينطبق عالعين، فالعين الضعيفة يهملها الدماغ ويسميهة كسولة بسبب ضعف التحفيز البصري.
🔳 شنو أسبابهة؟
⚪️ اغلب الناس رابطة كسل العين بالحول، وهو فعلا احد الاسباب لان الدماغ يهمل العين اللي دتجيب صورة ممطابقة للثانية حتى لا تصير إزدواجية بالرؤية.
⚪️ بعض الاطفال ينولدون بماء أبيض، هطول جفن، او مشاكل خلقية بتركيب العين.
⚪️ من الاسباب الشائعة هو اكو بُعد/إستكماتزم/قُصر و ممتصحح.
🔳 الاعراض؟ عادة ماكو! لان الطفل ميعرف يشكي، لذلك ننصح دائما بالفحص الدوري. مرات يكون حول واضح او امالة الرأس الى جهة.
🔳 شدة الكسل؟ تعتمد على قوة الغواش بالعين، طول الفترة، عمر الطفل بوقت بدأ الضعف.
كل ما كان غواش عالي + لفترة طويلة + بعمر صغير رح تكون شديدة.
شلون تكدرين تفحصية، الوقاية و طرق العلاج؟ بالبوست القادم.
#د_صهيب
د. صهيب علي جواد
أخصائي طب و جراحة العيون
https://www.facebook.com/dr.sohaib.vision/
from د. سيف سمير البياتي