اليوم محضرلكم صدمه
اكول بيها
منو كال السعال مضر؟
و بالأخص للاطفال الرضع تحت عمر السنه
السعال هو منعكس الجسم يسويه حتى يطرد الافرازات و الالتهابات
من توكفين الكحه راح تحبسين هذه الافرازات جوه !!!
و اذا طفلك عنده تحسس راح يزيد الوضع سوء
زين انت العلاج اللي كاعد تنطيه اللي هي شرابات السعال
هل هي تعالج السعال؟
الجواب لا
لان السبب هي فيروس و مجرد ننتظر يخلص
طيب دكتور
الله اكبر عليك
حتى شراب كحه ما ننطي لعد شنسوي ؟
اولا
امي اذا ابنك عنده حساسيه القصبات هذا علاجه يم الطبيب و طبعا اهم شي بعلاجها هو جهاز البخاخ
ثانيا اهم شي و اللي متفق عليه بعلاج السعال
هو السوائل السوائل السوائل
و بما انه هذا البوست خاص بالرضع
إذن ما عدنا غير الحليب فاكولك زيدي الرضاعه
ثانيا تنظيف الأنف
و منزل بوست عن كيفيه التنظيف
ثالثا
مصدر البخار لا تنسيه و هم نزلت بوست عن الموضوع قبل فتره
رابعا
اذا كلش السعال قوي ممكن تنطيه شراب سعال خفيف جدا و اكيد يفضل بوصفه طبيه حتى يعرف طبيبك يختار اخف شراب للسعال
مراجعيني يعرفون انه اني اهم شي عندي أعالج السبب مو بس اوكف الكحه و هاهيه
الكحه مفيده
و ما استعجل بعلاجها
آخر شي
اذا طفلك عبر السنه
انطيه عسل
لان العسل ممنوع تحت السنه بسبب انه قد يحتوي على جرثومة تسبب شلل الأمعاء
و ياريت اهلنا العراقيين اللي ساكنين خارج العراق يحجولنا
عن علاج السعال بالخارج؟
د. سيف سمير البياتي
اخصائي طب الأطفال
