اعرفكم بفايروس نعرف عنه القليل
في حين بمصر مثلا من تكول لام ابنك عنده هربس
راسا تعرف الفايروس كانما تكول لام عراقيه انه الطفل انفلونزا
الهربس هو
Herpes simplex virus
هذا الفايروس هو الفايروس اللي يسوي القرحه البارده اللي اغلبنا نعاني منها اللي اسمها بالعراقي ( لطمه الحمى )
و القصد هو علامه الحراره
الفايروس اول ما ناخذه
ناخذه من نكون اطفال
و يكون شديد
و شديد جدا
حراره توصل لل ٤٠ و انزعاج و الكثير الكثير من اللعاب
و حتى تورم باللثه
و بعدين تطلع عند الاطفال قرح صغيره
ممكن ببدايه الفم و ممكن بنهايتها مثل الصوره
و يخلص المرض بعد ٧ الى ٩ ايام
بعد ما انهك الطفل بالحراره العاليه و قله الشهيه
الفايروس هذا ما راح يروح بعدها
يبقى خاتل باجسامنا
و ينتظر اي قله للمناعه
بس بما انه الجسم تعود عليه
ما راح يكون قوي من ينشط
راح يكون مجرد التهاب موضعي نسميه القرحه البارده ( لطمه الحمى )
لذلك هذا المرض اللي اسمه الهربس بيه شكلين
شكل قوي و عنيف و بحراره
و بالمره الثانيه يكون خفيف و مجرد الم موضعي
الطفل ممكن ينعدي مننا احنا الكبار من عدنا لطمه حمى
لذلك من تطلعلك حاول لا تقترب من الطفل
المشكله انه يظل يعدي لفتره من اسبوع الى ٧ اسابيع
لذلك اني ضد تقبيل الطفل
اما اذا الطفل عمره اقل من شهرين و طلعلك لطمه الحمى فابتعد جدا عن الطفل
لان ممكن يكون الالتهاب شديد جدا
او على الاقل لا تبوسه
اما الامهات اللي يرضعون طبيعي فالبسي كمامه و رضعي طفلك حتى تعبرله الاجسام المضاده
و يكون محمي جيدا
العلاج بسيط و سهل
مضاد فايروسي اسمه زوفراكس
و الكثير الكثير من السوائل البارده و اللبن البارد و الايس كريم حتى تتخدر المنطقه
د. سيف سمير البياتي
اخصائي طب الاطفال
