ارجاع طفلك للرضاعه الطبيعيه !!
على الرغم من ان الموضوع يمكن يكون صعب و لكل طفل حاله خاصه
بس الطب يقدر لو قطره وحده من الحليب الطبيعي
طبعا باغلب الدول هيجي حالات تراجع اخصائي او مدرب رضاعه طبيعيه و اللي ياخذون بيها دورات او بورد
بس مع الاسف نفتقد هيجي اختصاص و ان شاء الله يصير عدنا ولو حتى لو دوره سريعه على مدى اشهر
المهم نرجع لموضوعنا
راح اكتبلكم ١٠ طرق من احد الدورات اللي دخلتها :
1. حاولي ترضعين طبيعي من الطفل نصف نايم نصف كاعد او من الطفل مرتاح و مرتخي بحضنك
لا ترضعين الطفل طبيعي و هو جوعان
انطي الرضاعه الطبيعيه و انت تتمشين
او انت دا تغسلين للطفل و هو مرتاح
قربيه منك اكثر و خلي جلده على جلدك فترات اطول
2. خليه يشوف طفل اخر يرضع طبيعي
و انت كاعده مع صديقتك اللي ترضع طبيعي كوليلها خلي ترضع طبيعي و شيلي ابنك و حاولي ترضعيه
مره على مره
اكيد مو من مره وحده
3. من كاعد يرضع مميه طلعي المميه و خلي صدرك بفمه
مره على مره
و انطيه بين الرضعات كذلك
ابدا لا تجبريه ابدا ابدا
اعطاء الرضاعه الطبيعيه بنص الرضاعه الصناعيه طريقه مثبته الفعاليه
بس الجبر سيء جدا
4. اذا بدا ياخذ و نام و انت تردين تحفزين انتاج الحليب سوي حرف C على الصدر و اضغطي برفق
هذا يعزز انتاج الحليب و يخليه ينزل
5. لا للملهيه
اكبر مخرب لانتاج الحليب الطبيعي هي الملهيه
6. اريدك ترتاحين قدر الامكان
و تريحين اعصابك
اعاده الرضاعه الطبيعيه متعبه
فاريدك ترتاحين و تنامين جيدا
و تريحين نفسيتك
7. تذكري دائما اكبر و احسن محفز لانتاج الحليب هو التفريغ
كلما تفرغين اكثر ينزل اكثر
لذلك حاولي تفرغين و تنطيه بالمميه
عن طريق المضخه او اي شي اخر
تقريبا ٨ الى ١٠ مرات باليوم اما رضاعه طبيعيه او سحب بالمضخه
8. للامهات اللي ما ناطين مميه و مصرات على موضوع الرضاعه الطبيعيه و ما يردون ينطون مميه
بس الحليب ما يكفي
انطي الحليب الصناعي بسرنجه او بملعقه او كوب صغير
اذا شفتي الموضوع صعب
استخدمي المميه بس خليها افقي قدر الامكان حتى الطفل يتعب لما يحصل الحليب و ما يتعود ع الرضاعه الصناعيه
9. و بدت تنجح الخطوات المكتوبه فوك و بدينا نتحسن و الحليب زين و انت زينه و الطفل زين
ابدي قللي المميه قدر الامكان
لا تنطين صناعي هوايه
شويه شويه لما تتركيها
خصوصا اذا وصلتي ٤ اشهر او ٦ اشهر
خليك رضاعه طبيعيه و اكل
10. اخذي محفزات الرضاعه الطبيعيه
تنباع بالصيدليات حبوب كثيره للرضاعه الطبيعيه
بتركيا كان اكو شاي محفز للحليب الطبيعي يزيد الانتاج
المحفزات خليتها اخر نقطه لان مو كلش فعاله اذا ما سويتي الطرق ال٩ اللي مكتوبه فوك و اذا الطفل ما اخذ
اذا ياخذ و الحليب قليل
اي المحفزات ممكن تفيد
د. سيف سمير البياتي
اخصائي طب الاطفال
