شويه كورونا
↖️ كورونا بالعراق حاليا اصاباته فوك الالف لفتره اسبوعين و اكثر و هذا معناه انه الانتشار كبير كبير كبير
لان اذا جمعناه لمده اسبوعين اللي هي فتره العدوى يعني عدنا ١٤ الف شخص راح يعدي
و اذا كل واحد منهم عدا واحد هاي عدنا ٢٨ الف خلال اسبوعين فقط
هذا على اقل تقدير في حين الواقع اكيد اكبر من هالشي
↖️ طرق الوقايه هي نفسها اللي نعرفها و اهمها التباعد الاجتماعي
و خلي مسافه متر و نص
ابتعد عن الاماكن المغلقه
ماكو احضان
ماكو بوس
🌷اي احد عنده نوبه برد نشله سعال فقدان الشم حراره بلغم صعوبه بالبلع صعوبه بالتنفس نايم على سبلت نايم على مبرده نايم على مروحه يعزل نفسه بالبيت لا يبرر و لا يكول استبردت
😍 العزل ١٤ يوم من اول يوم ظهور الاعراض
🌷 اهم شي الغرفه محد يطبها و يستخدم حمام منفصل اذا موجود ما موجود الحمام المنفصل يعقم وراه كلشي جيدا
⭕ اهم سلاح عندك هو خافض الحراره اخذ خافض الحراره مثل البندول
🌷 تذكر دائما السعال جيد لا توكفه و خليك تكح و ما نريد نوكفها للكحه
✅ اشرب سوائل بارده حاره اللي تحب يس لا حلوه و تخرب نظامك المناعي
↖️ اكو ادويه على اساس تزيد المناعه هي مو كلش مفيده تريد تاخذها اوكي اخذها بس لا تزيد بكيفك
🦀 العسل يقلل السعال بس هل يعالج الكورونا؟
الجواب لا
🌷فيتامين دي القليل هو الوحيد المثبت علميا انه سبب من أسباب الانتشار في الدول اللي مستوى فيتامين دي قليل
و يكولون باحد البحوث انه من يصير فيتامين دي قليل اعراض كورونا تصير شديده لذلك اخذ فيتامين دي ١٠٠٠ وحده دوليه يوميا
🍏فيتامين سي قسم يكولون يساعد قسم يكولون ما يساعد عادي تريد تاخذه اخذه
البروتوكول المصري للعلاج ينطون بيه ١٠٠٠ ملغرام يوميا
🍒 المستشفى نروحلها من نحس بضيق التنفس
او ضيق التنفس شديد
او ازرقاق في الوجه و الفم
او نوبات اغماء
🥔 كل اللي تقروه عن ادويه و مضادات حيويه و غيرها و خصوصا العلاجات الاخيره مثل الدكسون تسوء الوضع ما تحسنه اذا اخذته خارج المستشفى
🌰جهاز البخاخ اغلب العلماء يكولون ما يفيد
بس اذا حسيت بضيق تنفس خلي ٢ سيسي مغذي مالح و استنشقه لما تروح للمستشفى
☯️ اذا ترضعين طبيعي عادي كملي رضاعه طبيعيه
و غسلي ايدك قبل ما تشيلين الطفل و لبسي كمامه
اذا تكدرين تشفطين الحليب و تنطيه بزجاجه الارضاع بعد احسن
وراها اعزلي نفسك
🚸 البارحه طلع بحث يكول انه الديكادرون يقلل الوفيات بالحالات الشديده من الكورونا و اللي على اوكسجين
و حسب ما وصلني انه بعض الناس مع شديد الاسف اشترت الديكادرون و ضمته
بس لحظه !!
الديكادرون مثبط مناعه و من تاخذه ببدايه المرض راح تقوي الفايروس عليك
انتظر
الديكادرون يفيد فقط فقط فقط في الحالات الشديده اللي يحتاج بيها المريض اوكسجين
و اخذه بالبدايه يزيد من شده المرض عندك
اخر شي نذكر بالاساسيات:
٨٠ الى ٨٥ بالميه من حالات الكورونا تطيب وحدها و ما تحتاج شي
١٠% من المرضى يحتاجون مستشفى و يتم العلاج
٥% من الناس فقط يحتاجون الى عنايه تنفسيه شديده
نذكر باساس الاساس
لو تقلل طلعتك و اختلاطك من البدايه ما يصير بيك لا كورونا و لا اي شي
حاول قدر الامكان تبقى بالبيت
و اني لسه و لحد الان انادي بالحظر الشامل لمده ٤ او ٦ اسابيع
حظر شامل حقيقي بلا استثناءات
د. سيف سمير البياتي
اخصائي طب الاطفال
